Hamza e refuzon ofertën e dytë të Kurtit për presidentin dhe Specialen
Kryeministri i Kosovës, Albin Kurti, ka bërë një propozim të ri për Partinë Demokratike të Kosovës (PDK), në përpjekje për të tejkaluar krizën institucionale.
Në një konferencë për media, Kurti ka deklaruar se Lëvizja Vetëvendosje është e gatshme që fillimisht të votojë në lexim të dytë Projektligjin për ndryshimin e Ligjit për Dhomat e Specializuara, nëse PDK-ja zotohet se do të marrë pjesë në votimin për zgjedhjen e presidentit.
“Partia Demokratike e Kosovës (PDK) refuzoi ofertën tonë që ta mbështesim profesor Bekim Sejdiun. E unë besoj që në rast të përgjigjes së tyre pozitive, profesor Bekimi do të rikthehej. Përveç tij, natyrisht i kemi edhe dy emra të cilët ne këtë vit i kemi prezantuar si kandidatë për president: Glauk Konjufca dhe Feride Rushiti, e të cilët po ashtu janë aktualë nëse ka interesim nga opozita”, tha ai.
Ai ka propozuar që Kuvendi të mblidhet në një seancë me dy pika të rendit të ditës.
“Pra, le të bëjmë sonte një seancë Kuvendi me dy pika: votimi i projektligjit të dytë për Specialen dhe zgjedhja e presidentit”, ka thënë Kurti.
Sipas tij, lideri i PDK-së, Bedri Hamza, duhet të japë zotimin se deputetët e PDK-së do të marrin pjesë në votimin për presidentin.
“Dhe ne, pas zotimit të tyre, menjëherë po ua votojmë edhe leximin e dytë, nëse ata mendojnë që nuk përbën problem mosrespektimi i afatit prej 72 orësh ndërmjet dy mocioneve. Pra, ne ua votojmë projektligjin për Gjykatën Speciale paraprakisht, e mandej sonte menjëherë bëhet votimi për president, Glauku ose Feridja”, ka thënë Kurti. /Telegrafi/
