Shteti lituanez ka konfirmuar se do të dërgojë trupa ushtarake në Kosovë, në kuadër të misionit të KFOR-it, bashkë me Gjermaninë.
Kjo u bë e ditur nga ministria e mbrojtjes e këtij vendi gjatë Ministerialit të Paqes së OKB-së në Berlin, ku Lituania riafirmoi angazhimin e saj për paqen globale.
“Është planifikuar një pjesëmarrje e re e përbashkët në operacionin ndërkombëtar në Kosovë së bashku me trupat gjermane. Ministria e Mbrojtjes Kombëtare i ka paraqitur Kuvendit për shqyrtim një projekt-rezolutë, e cila propozon rritjen e numrit të trupave lituaneze në operacionin ndërkombëtar KFOR të udhëhequr nga NATO në Kosovë nga 5 në 60. Duke rritur numrin e trupave në këtë operacion, Lituania po forcon bashkëpunimin me partnerin e saj strategjik Gjermaninë, duke iu përgjigjur kështu kërkesës së Ministrisë së Mbrojtjes Gjermane”.
“Nëse Kuvendi miraton projekt-amendamentin e rezolutës, një togë ushtarësh të Forcave të Armatosura Lituaneze do t’i caktohet kompanisë gjermane që merr pjesë në operacionin KFOR të NATO-s në Kosovë. Rotacioni i parë gjysmëvjetor i trupave lituaneze është planifikuar të vendoset këtë vit”, ka thënë ministria lituaneze e mbrojtjes.
Për këtë ka reaguar edhe misioni gjerman në NATO, duke shkruar shkurtimisht: “Më të fortë së bashku”. /Klankosova.tv
