Kryeministri Albin Kurti ka njoftuar hapjen e thirrjes së parë publike për aplikim për Licencën e Avancuar për Mësimdhënie, një iniciativë e Ministrisë së Arsimit, Shkencës, Teknologjisë dhe Inovacionit.
Ky hap, sipas Kurtit, ka si qëllim përmirësimin e cilësisë së arsimit në Kosovë, duke ofruar mundësi për mësimdhënësit që të zhvillojnë më tej aftësitë e tyre profesionale dhe të përgatiten për gjeneratat e ardhshme.
“Të gjitha ato e ata që do të përmbyllin suksesshëm këtë proces do të përfitojnë shtesën e performancës”, shkruan Kurti.
Edhe, Ministria e Arsimit, Shkencës, Teknologjisë dhe Inovacionit, ka njoftuar për hapjen e këtij konkursi.
“Në kuadër të reformave për zhvillimin profesional të mësimdhënësve dhe avancimit të performancës së tyre kemi hapur sot thirrjen për aplikim për mësimdhënësit që synojnë të marrin Licencën e Avancuar për Mësimdhënie”.
“Bashkë, çdo ditë për rezultate të synuara e avancim të performancës në arsim”, ka thënë Nagavci.
Thirrja vlen për mësimdhënësit e profileve si më poshtë:
Mësues të arsimit fillor;Mësimdhënës të lëndës “Matematikë” në Arsimin e Mesëm të Ulët (AMU) dhe Arsimin e Mesëm të Lartë (AML);Mësimdhënës të lëndës “Gjuhë shqipe” në Arsimin e
Mesëm të Ulët (AMU) dhe Arsimin e Mesëm të Lartë (AML).
Aplikimi mund të bëhet përmes platformës e-kosova nga sot deri më 19.12.2024. Të gjitha ato/ata që do të përmbyllin suksesshëm këtë proces do të përfitojnë shtesën e performancës. /GazetaBlic/
