Në zhvillimin e sportistëve por edhe në cilësinë e sportit, shëndeti mental konsiderohet të jetë tejet i rëndësishëm dhe jetik për secilin atletë që merret me fushën e sportit.
Kështu u tha me rastin e ditës ndërkombëtarë të Shëndetit mental në sport, ku Komiteti Olimpik i Kosovës ka organizuar seminarin “Shëndeti mental në sport” i cili ju dedikohet trajnerëve aktiv në Kosovë.
Niveli i cilësisë së shëndetit mendor në sport u tha se është një element kyç dhe i domosdoshëm i karrierës sportive të çdo sportisti. Shëndeti mendor ndikon jo vetëm në performancën e sportistit, por edhe në jetën e tij të përditshme dhe në mirëqenien e përgjithshme.
Presidenti i KOK ut, Ismet Krasniqi, me këtë rast deklaroi se krahas performancës, shëndeti mental ka ndikim të drejtëpërdrejtë edhe në mirëqenien dhe jetën e përditshme të çdo sportisti.
“Krahas performancËs, shëndeti mental ndikon edhe në jetën e përditshme dhe në mirëqenien e përgjithshme të sportistit i cili në mungesë të një psikologu në klubin e tij, të gjitha problemet që mund t’i ketë, mund t’i adresojë tek trajneri i cili tek ne luan rolin edhe të përgatitësit fizik, nutricionistit, e po ashtu edhe të psikologut. Nga fillimi i këtij viti, Komiteti Olimpik i Kosovës, krahas 25 bursave Paris 2024 edhe Milano Kortina 2026, 35 bursa për shpresa olimpike, kemi filluar edhe dhënien e bursave për trajner të cilët kanë fituar medalje olimpike botërore, evropiane dhe mesdhetare ”, tha Krasniqi.
Për këtë temë dhe raste të ndryshme që lidhen me këtë temë do të ligjërojë psikologia e sportit Sllovenia, Andreja Holsedl.
Në këtë seminar një ditor po marrin pjesë 40 trajnerë nga federata dhe sporte të ndryshme vendore. /KosovaPress/
