Kosova ka shënuar përmirësim në Indeksin e Perceptimit të Korrupsionit, duke u renditur në vendin e 73-të në ranglistën botërore. Ndërsa në mesin e shteteve të Ballkanit Perëndimor, ajo është pozicionuar pas Malit të Zi, duke lënë pas Shqipërinë, Maqedoninë e Veriut, Serbinë dhe Bosnje e Hercegovinën.
Mali i Zi është renditur me 46 pikë në vendin e 65-të, Kosova me 44 pikë në vendin e 73-të, Shqipëria me 42 pikë në vendin e 80-të, Maqedonia e Veriut me 40 pikë në vendin e 88-të, Serbia me 35 pikë në vendin e 105-të dhe Bosnja e Hercegovina me 33 pikë në vendin e 114-të.
Në vitin 2023, Kosova ishte vlerësuar me vetëm 41 pikë.
Kosova ishte renditur në këtë vit pas Malit të Zi dhe pas Maqedonisë së Veriut.
Indeksi i Perceptimit të Korrupsionit (CPI – Corruption Perceptions Index) është një matje vjetore e nivelit të korrupsionit në sektorin publik të vendeve të ndryshme të botës.
Ky indeks publikohet nga organizata Transparency International dhe bazohet në perceptimet e ekspertëve dhe bizneseve mbi korrupsionin në administratën publike dhe politikë.
Vendet vlerësohen me pikë nga 0 deri në 100, ku 0 tregon nivelin më të lartë të korrupsionit dhe 100 tregon mungesë të korrupsionit./Albanianpost.com
