Guvernatori i Hawait, Josh Green, tha se kërkimi në ujë për qindra njerëz të listuar si të zhdukur më shumë se 20 ditë pasi zjarret shkatërruan qytetin historik të ishullit Maui të Lahaina, është afër përfundimit dhe se presin që numri i të pagjeturve të bjerë në dyshifrorë.
Që kur zjarri shpërtheu në Lahaina të Maui-t më 8 gusht, zyrtarët kanë thënë se 388 persona mbeten të zhdukur.
Të enjten, Green në një përditësim të shkurtër me anë të një videoje tha se kjo mund të ndryshojë të premten.
“Ne jemi të mërzitur, por ende po shohim se numri i individëve të pagjetur bie”, tha ai. “Do të marrim një përditësim të madh nesër dhe në pritje të atij përditësimi, mendojmë se numri ka rënë në dyshifrorë, kështu që faleminderit Zotit”.
Green të martën kishte njoftuar se kërkimet tokësore për viktimat kishin përfunduar dhe përpjekjet do të zhvendoseshin në oqean, aty ku shumica kërkuan strehim nga flakët.
Të enjten, ai shtoi se “ata në thelb kanë përfunduar kërkimin me përjashtim të një pjese të vogël të zonës ujore”.
Numri i të vdekurve është ende në 115, megjithëse zyrtarët po punojnë për të konfirmuar identitetin e trupave të gjetur.
/klankosova/
