Po mbahet takimi në Bruksel në mes zëvendëskryeministrit Besnik Bislimi dhe përfaqësuesit të BE-së për dialogun, Miroslav Lajçak.
Ky takim vjen pas kërkesës për shtyrje të vendimit të Qeverisë së Kosovës për qështjen e targave ilegale.
Nga ana tjetër, Josep Borrell, përfaqësuesi i Lartë i BE-së për Politikë të Jashtme, në konferencë për media pas takimit të Këshillit të ministrave të jashtëm BE-së, ka thënë se situata në Kosovë është më e rrezikshmja që nga viti 2013.
Borrell ka ftuar Kosovën dhe Serbinë që të tregojnë urgjentisht gatishmëri për të ecur para e t’i ulin tensionet.
Më tej ka shtuar se Kosova duhet të tregojë fleksibilitet për çështjen e targave, ndërsa duhet të nisë edhe punën për themelimin e Asociacionit të komunave me shumicë serbe.
“Serbët e Kosovës duhet të kthehen në institucione të Kosovës, autoritetet e Kosovës të tregojnë fleksibilitet për targat, e të punojnë në implementimin e Asociacionit të komunave me shumicë serbe pa vonesa”, ka thënë Borrell.
Kujtojmë se pavarësisht kërkesave të shumta për shtyrje të vendimit për targa, Qeveria e Kosovës, ka nisur zbatimin e tij më 1 nëntor.
Faza e parë e planit parasheh qortimin e shoferëve që vozisin makina me targa të paligjshme; e dyta parasheh gjoba prej 150 eurosh, ndërsa në të tretën do të shpërndahen targa provuese.
Me këtë plan, pritet që nga 21 prilli i vitit të ardhshëm, në komunikacion të lejohen vetëm makina me targa RKS. /Telegrafi/
