Google zbuloi së fundmi, gjoja rastësisht, ridizajnimin e saj të radhës të madh të platformës Android – Material 3 Expressive.
Në një postim në blog, i cili tani është fshirë, i vërejtur nga 9to5Google, kompania i përshkruan ndryshimet në dizajn si përditësimin e saj “më të hulumtuar” deri më tani, që synon ta bëjë ndërfaqen e Android më tërheqëse dhe më të lehtë për t’u përdorur.
Nëse jeni të interesuar, një version i arkivuar i faqes së fshirë mund të gjendet në faqen e internetit të Wayback Machine.
Google thotë se e zhvilloi dizajnin Material 3 Expressive duke kryer 46 raunde dizajni dhe kërkimi me më shumë se 18,000 pjesëmarrës.
Dizajni përdor ngjyrën, formën, madhësinë dhe lëvizjen për ta bërë një produkt më të mirë për t’u përdorur.
Ditët e fundit, ka dalë informacion se Google po planifikon të zbatojë ndryshime në ndërfaqen e përdoruesit të Android, duke përfshirë ikona të ridizajnuara në shiritin e statusit, një font të ri për orën dhe një menu të ripërpunuar të cilësimeve të shpejta. /Telegrafi/
