Gareth Southgate ka zbuluar se bisedimet për një kontratë të re si trajner i Anglisë janë shtyrë për pas Kampionatit Evropian të kësaj vere.
53-vjeçari do të udhëheqë “Tre Luanët” në turneun e tij të katërt të madh si trajner në Gjermani, me Anglinë një nga favoritët për të ngritur kurorën kontinentale.
Southgate fillimisht mori drejtimin e kombit të tij në një bazë të përkohshme me katër ndeshje në shtator 2016, pas shkarkimit të Sam Allardyce.
Që atëherë, 53-vjeçari e ka udhëhequr Anglinë në një gjysmëfinale të Kupës së Botës në Rusi në 2018, si dhe në finale e Euro 2020 kundër Italisë së Roberto Mancini-t tre vjet më parë.
Duke folur pas njoftimit të skuadrës së tij përpara miqësoreve të marsit kundër Brazilit dhe Belgjikës në “Wembley”, Southgate deklaroi se ai është i fokusuar vetëm në sigurimin e lavdisë së turneut të madh për Anglinë në verë, jo të ardhmen e tij.
“Jam plotësisht i qetë për këtë (e ardhmja pas Euro-s) dhe nuk e kam idenë se ku do të jemi në mes të korrikut”, tha trajneri i Anglisë, Southgate.
“Unë mendoj se do të duhet të ulemi dhe të mendojmë për këtë në fund të turneut. Jam i lumtur të flas për këtë shkurtimisht tani”, shtoi ai.
Siç u aludua, kuptohet se FA shpreson të shmangë përsëritjen e një historie si në vitin 2010, kur trajneri i atëhershëm i Anglisë Fabio Capello nënshkroi një kontratë të re përpara Kupës së Botës në Afrikën e Jugut.
Me shpresat e larta rreth mundësive të Anglisë për të fituar trofeun e parë të madh që nga viti 1966, Southgate është i prirur të shmangë vendosjen e ndonjë stresi të panevojshëm në skuadrën e tij.
“Mendoj se ka potencial të ndikojë negativisht në reagimin ndaj ekipit. Kështu që detyra ime është të heq presionin nga ekipi aty ku është e mundur”, tha Southgate.
“Duhet të pranojmë disa presione sepse jemi një nga favoritët. Por, po ashtu, nuk dua të shtoj asgjë shtesë në ekip”, vijoi ai.
Sipas “The Mirror”, FA është e gatshme t’i dorëzojë Southgate një kontratë të re si menaxher i “Tre Luanëve” deri në Kupën e Botës 2026 në Amerikën e Veriut.
53-vjeçari aktualisht është në një marrëveshje prej 2.5 milionë paundësh në vit si trajner i Anglisë dhe ka të ngjarë të shohë rritje të pagës së tij vjetore nëse bien dakord për kushte të reja.
Kontrata aktuale e Southgate skadon në dhjetor, duke i lënë kohë FA dhe ish-menaxherit të Middlesbrough për të vlerësuar të ardhmen e tij pas Euro 2024 së kësaj vere. /Albanianpost.com
