Pas gati pesë vitesh mungesë, loja popullore “Fortnite” është rikthyer në iOS App Store në Shtetet e Bashkuara, njoftoi Epic Games. Loja është gjithashtu sërish e disponueshme në Epic Games Store dhe AltStore, pas një marrëveshjeje mes Epic dhe Apple që i jep fund konfliktit të gjatë ligjor mes tyre, shkruan Gazeta Sinjali.
Apple e kishte hequr “Fortnite” nga App Store në vitin 2020, kur Epic zgjodhi të anashkalojë sistemin e pagesave të Apple duke prezantuar mënyrën e vet të pagesës në lojë – veprim që shkelte rregullat e App Store. Pas një beteje ligjore të gjatë dhe një vendimi gjyqësor që i kërkoi Apple të lejonte pagesat e jashtme, “Fortnite” është rikthyer në platformat iOS në SHBA.
Regjisori i Epic, Tim Sweeney, kishte paralajmëruar më herët rikthimin e lojës në iOS. Më 9 maj, aplikacioni u dorëzua për rishqyrtim nga Apple përmes një llogarie suedeze të zhvilluesit të Epic. Megjithatë, Apple e kishte bllokuar përkohësisht publikimin duke kërkuar që përditësimi të mos përfshinte App Store-in në SHBA për të shmangur ndikimin në tregjet e tjera.
Pas ndërhyrjes së një gjykatësi amerikan dhe presionit ligjor, Apple dhe Epic arritën një marrëveshje të përbashkët që riktheu lojën në platformën iOS. Si pjesë e promovimit të ri, Epic ofron shpërblime prej 20% për lojtarët që përdorin sistemin e saj të pagesave në “Fortnite”, “Rocket League” dhe “Fall Guys” – shpërblime që mund të përdoren për blerje të ardhshme në lojë ose në Epic Games Store.
