Aksidentohet një kamion me një veturë në Gjakovë, lëndohet një person
Turizëm, investime në prona të paluajtshme, kompani transporti dhe blerje mallrash të shtrenjta.
Këto janë rrugët më të zakonshme të përdorura nga 86% e organizatave kriminale më të rrezikshme në Bashkimin Europian për të pastruar paratë e përfituara nga aktivitetet kriminale.
Ky është rezultati i raportit të parë të Europol për rrjetet kriminale më të rrezikshme të BE-së.
Raporti në fjalë u prezantua sot nga Drejtoresha Ekzekutive e Europolit, Catherine De Boll, në prani të Komisionerit të Drejtësisë Didier Reynders dhe Komisioneres së Punëve të Brendshme Ylva Johansson.
Raporti analizonte mbi 800 rrjete kriminale dhe 25,000 individë bazuar në të dhënat nga të gjitha shtetet anëtare të BE-së dhe 17 vende të treta, duke përfshirë aktivitete kryesore kriminale si trafiku i drogës, kontrabandimi i emigrantëve dhe trafikimi i qenieve njerëzore.
Sipas raportit, këto rrjete kriminale, tashmë të njohura nga autoritetet e BE-së, përdorin “investimet legjitime” për të pastruar paratë, duke zgjedhur kryesisht tregun e pasurive të paluajtshme, sektorin e turizmit, transportin e mallrave dhe sektorin e ndërtimit.
Në veçanti, rrjetet më kriminale në BE zgjedhin pronat e paluajtshme, me një normë prej 41%, duke përdorur avokatë dhe ekonomistë, të cilët shpesh nuk e dinë origjinën e parave, ndërsa organizata të tjera zgjedhin investimet me vlerë të lartë, mallra si ari dhe mallra luksi (27%) apo sektorin e turizmit (20%) dhe përdorimin e kriptomonedhës (10%).
Shumica e bandave më të rrezikshme të Europës fokusohen në trafikun e drogës, kokainë, kanabis, heroinë dhe drogërave sintetike dhe operacionet e tyre zhvillohen më shpesh në Belgjikë, Gjermani, Itali, Holandë dhe Spanjë.
Sipas Europol, klubet e natës janë shpesh të lidhura me trafikun e drogës, zhvatjen dhe trafikimin e njerëzve dhe armëve, ndërsa në sektorin e logjistikës, veçanërisht në portet kryesore europiane, punëtorët janë objektiva të korrupsionit pasi mund të “lehtësojnë hyrjen në porte “, kryesisht për lëndë narkotike.
Raporti i Europolit demonstron gjithashtu natyrën shumëkombëshe të këtyre organizatave pasi 76% e tyre operojnë në dy deri në shtatë shtete të ndryshme anëtare të BE-së, ndërkohë që shumë prej tyre funksionojnë prej vitesh, me 31% që funksionojnë për më shumë se një dekadë, madje disa organizata janë treguar të afta për të vazhduar aktivitetet e tyre edhe nëse anëtarët e tyre kryesorë janë në burg.
Siç thuhet në raport, në përgjithësi, krimi i rëndë dhe i organizuar është ndërkombëtar pasi më shumë se 112 kombësi të ndryshme janë identifikuar në këto organizata kriminale. Kriminelët janë kryesisht nga Shqipëria, Bosnje -Hercegovina, Kina, Gjeorgjia, Islanda, Nigeria, Serbia, Turqia, Mbretëria e Bashkuar dhe Ukraina.
Organizatat kriminale të përbëra kryesisht nga ukrainas janë të përfshirë kryesisht në trafikimin e qenieve njerëzore dhe veprojnë kryesisht në Poloni dhe Ukrainë.
Organizatat kriminale të përbëra kryesisht nga shtetas shqiptarë janë kryesisht aktive në trafikun e kokainës, heroinës dhe kanabisit, kryesisht në Belgjikë, Francë, Gjermani, Itali, Holandë dhe Spanjë, ndërsa organizatat e përbëra nga shtetas gjeorgjian janë të përfshirë kryesisht në grabitje dhe vjedhje banesash, në Greqi, Itali, Maltë, Poloni, Portugali dhe Spanjë. /abcnews.al
