Bayerni i beson talentit kosovar, Erblin Osmani në listë për përballjen me Atleticon
Demokratët pritet të marrin kontrollin e të dyja dhomave të Kongresit amerikan, Senatit dhe Dhomës së Përfaqësuesve, sipas projeksioneve të CNN-it pas zgjedhjeve të mesmandatit të mbajtura më 3 nëntor.
Në Senat, demokratët kanë siguruar 53 ulëse, kundrejt 39 të republikanëve, duke arritur shumicën e nevojshme për të marrë kontrollin e kësaj dhome të Kongresit.
Demokratët kanë fituar gjashtë ulëse nga republikanët, ndërsa 34 ulëse të tyre dhe 31 të republikanëve nuk ishin në garë në këto zgjedhje.
Edhe në Dhomën e Përfaqësuesve, demokratët janë në rrugë për të marrë shumicën. Deri në momentin e publikimit të grafikës, ata kishin siguruar 197 ulëse, ndërsa republikanët 114.
Demokratët kanë fituar 10 ulëse nga republikanët, ndërsa për të siguruar shumicën në Dhomën e Përfaqësuesve nevojiten të paktën 218 nga gjithsej 435 ulëset.
Marrja e kontrollit të të dyja dhomave të Kongresit nga demokratët do të përbënte një ndryshim të rëndësishëm në balancën politike në SHBA dhe do t’ia vështirësonte presidentit amerikan, Donald Trump miratimin e agjendës së tij politike.
Me shumicën në Kongres, demokratët do të kenë më shumë mundësi të ndikojnë në procesin legjislativ dhe të ushtrojnë mbikëqyrje mbi administratën amerikane.
Donald Trump ka publikuar një sërë reagimesh në rrjetin social Truth Social, pasi demokratët siguruan kontrollin e Kongresit dhe Senatit në zgjedhjet e mesmandatit.
Ai la të kuptohet se do të flasë më gjerësisht për rezultatet në ditët në vijim, duke thënë se do të “bëhet komentator politik, si për mirë ashtu edhe për keq, për arsyet pse këta kandidatë fituan apo humbën”.
Presidenti amerikan publikoi gjithashtu një fotografi të një kapeleje të kuqe me fjalën “VETO” të shkruar me shkronja të mëdha të bardha, në një stil të ngjashëm me kapelet MAGA, me të cilat ai u bë i njohur.
Lideri amerikan kishte deklaruar më herët se do të “vërë veton ndaj gjithçkaje”, nëse demokratët rimarrin kontrollin e Kongresit.
Në një tjetër reagim në Truth Social, Trump kritikoi ashpër televizionin Fox News për ftesën në emision të ish-kryetarit të bashkisë së New Yorkut, Bill de Blasio.
“Pse e fton Fox News në emision Bill de Blasion, kryetarin më të keq në historinë e qytetit të Nju Jorkut, që të dalë në televizion e të flasë pa lidhje si një i marrë?”, shkroi Trump.
Ai pretendoi se de Blasio ishte larguar nga detyra në turp dhe se dëmi që kishte shkaktuar ishte i pallogaritshëm.
“Qyteti nuk ka qenë më kurrë i njëjtë që atëherë, ndërsa tani ai po na tregon se si duhet ta qeverisim Amerikën”, shtoi presidenti amerikan.
Trump fajësoi gjithashtu Fox News për humbjet e republikanëve, duke pretenduar se televizioni vazhdimisht u jep hapësirë kundërshtarëve demokratë.
“Fox News mban përgjegjësi për këto humbje, pasi vazhdimisht dhe në mënyrë të përsëritur u jep hapësirë kundërshtarëve demokratë, madje edhe më keq se kaq”, përfundoi ai.
