Ceferin i ashpër me Super Ligën: Ka përfunduar si projekt njëherë e përgjithmonë

Super Leagua vazhdon me “telenovelën” e saj, edhe pse 9 klube u tërhoqën, teksa vetëm Barcelona, Real Madrid dhe Juventus vazhdojnë të këmbëngulin për të.

Presidenti i UEFA, Aleksander Ceferin, sërish ka goditur ata që tentuan të bëjnë një kompeticion për miliarderët, të mbyllur dhe vetëm për një pjesë të klubeve të futbollit.

“Miqtë e mi, kur ka harmoni mes UEFA-s dhe shoqatave anëtare të saj, klubeve, ligave, lojtarëve, trajnerëve, tifozëve, partnerëve të tjerë dhe të çdo qeverie europiane, mund të fitosh.

Ai ishte një projekt arrogant dhe përçmues, i ideuar nga një grusht miliarderësh që nuk mund të pranojë idenë se si në një fushë futbolli edhe në jetë mund të humbni ndaj dikujt që është më i vogël se ju. Në të tilla raste fiton futbolli.

Kjo Super League, që nuk më pëlqen ta quaj kështu sepse vetëm super nuk është, ka përfunduar si projekt njëherë e përgjithmonë për mua. Ose të paktën për 20 vite, se më vonë nuk e di se çfarë mund të ndodhë”, ka deklaruar Ceferin. /f.a/abcnews.al