Edhe pse shpërndarja e automjeteve në tregun e Amerikës së Veriut u rrit me 37 për qind gjatë tre muajve të parë të vitit 2025, kjo nuk mjaftoi për të kompensuar rëniet e mëdha të shitjeve në rajone të tjera kyçe për Porsche.
Prodhuesi gjerman i automjeteve luksoze regjistroi një rënie të ndjeshme të shpërndarjeve në Kinë dhe Evropë në tremujorin e parë të këtij viti, pjesërisht për shkak të heqjes nga tregu të disa modeleve që nuk përmbushin më rregulloret më të rrepta të BE-së për sigurinë kibernetike.
Shitjet në Kinë ranë me 42 për qind, në 9,471 automjete, ndërsa në Evropë (pa përfshirë Gjermaninë) u regjistrua një rënie prej 10 për qind, në 18,017 njësi. Vetëm në Gjermani, shpërndarjet ranë me 34 për qind, në 7,495 njësi.
Aksionet e Porsche AG mëngjesin e sotëm në bursën e Frankfurtit ishin në një rritje të lehtë prej 0.27 për qind, por në total që nga fillimi i vitit kanë humbur 26.6 për qind të vlerës së tyre.
Në nivel global, shpërndarjet e Porsche-s në tremujorin e parë ranë me 8 për qind, në 71,470 automjete. /Telegrafi/
