SHBA-ja i ka kërkuar Danimarkës të “qetësohet” pas thirrjes së diplomatit më të lartë amerikan në Kopenhagë lidhur me pretendimet se amerikanët kishin kryer operacione të fshehta në Grenlandë.
Transmetuesi publik danez, DR, ka cituar burime që thonë se qëllimi i operacioneve ishte të infiltrohej shoqëria grenlandeze dhe të promovohej shkëputja e saj nga Danimarka në SHBA, megjithëse burimet nuk mund të sqaronin për kë po punonin këta individë, raporton BBC.
Një zyrtar i Shtëpisë së Bardhë nuk ka konfirmuar një fushatë ndikimi, por ka deklaruar se “Ne mendojmë se danezët duhet të qetësohen”.
Ministri i Jashtëm danez, Lars Løkke Rasmussen, tha të mërkurën se “çdo përpjekje për të ndërhyrë në punët e brendshme të Mbretërisë (së Danimarkës) sigurisht që do të jetë e papranueshme”.
Inteligjenca daneze paralajmëroi se Grenlanda po shënjestrohej nga “lloje të ndryshme fushatash ndikimi”.
Një zëdhënës i Departamentit të Shtetit amerikan tha se i Ngarkuari me Punë, Mark Stroh, ishte takuar me Ministrinë e Punëve të Jashtme daneze, duke pasur një “bisedë produktive” që “riafirmoi lidhjet e forta” midis Grenlandës, Danimarkës dhe SHBA-së.
Zëdhënësi nuk komentoi mbi “veprimet e qytetarëve privatë amerikanë në Grenlandë”, por shtoi se SHBA-ja gjithmonë e ka respektuar të drejtën e popullit të Grenlandës për të “përcaktuar të ardhmen e tij”.
Presidenti i SHBA-së, Donald Trump, ka deklaruar disa herë se dëshiron të aneksojë Grenlandën, një territor gjysmë-autonom i Mbretërisë së Danimarkës, ndërsa zëvendëspresidenti JD Vance e ka kritikuar Kopenhagenin për investime të pamjaftueshme në territor.
Gjatë një vizite disa muaj më parë në Grenlandë, kryeministrja daneze Mette Frederiksen paralajmëroi SHBA-në se “nuk mund të aneksohet një vend tjetër”.
Danimarka, anëtare e NATO-s dhe Bashkimit Evropian, e ka parë SHBA-në si një aleat të ngushtë, por danezët janë tronditur nga vendosmëria e Trump-it për të kontrolluar territorin gjysmë-autonom.
Presidenti amerikan gjithashtu ka deklaruar këtë vit se nuk do ta përjashtonte mundësinë e një kapjeje me forcë./Sinjali
