Deri tani në shtrirje kombëtare, konflikti midis Kylian Mbappe-s dhe PSG-së për pagat e prapambetura së shpejti mund të marrë një dimension evropian.
Siç dihet, lojtari i Real Madrid-it kërkon një shumë totale prej 55.4 milionë eurosh nga ish-klubi i tij, i përbërë nga një bonus nënshkrimi (36.6 milionë euro), paga e prapambetur (5.75 milionë euro për tre muaj) dhe pjesa tjetër një bonus për të njëjtën periudhë.
Shumat nuk u paguan nga klubi parizien, i zemëruar për lëvizjen e Mbappe-s në Spanjë në fund të sezonit të kaluar.
Siç raporton “L’Equipe”, dy vendime të favorshme kanë ardhur tashmë pro lojtarit: i pari më 11 shtator 2024 nga komisioni ligjor i LFP (Ligës Profesionale Franceze), më pas i konfirmuar më 25 tetor 2024 nga komisioni i përbashkët i apelit.
Të dy kanë vërtetuar se shumat i detyrohen Mbappe-s nga klubi francez.
Megjithatë, ekipi ligjor i lojtarit nuk ka arritur ende të marrë pagesën, pasi komisioni disiplinor i LFP tha se nuk mund të sanksionojë PSG-në. Kjo për shkak se klubi, nga ana tjetër, ka nisur një veprim ligjor në gjykatën e Parisit për të sfiduar autoritetin e Ligës mbi mosmarrëveshjet e pagave.
Prandaj, avokatët e lojtarit vendosën të apelojnë në Komisionin e Lartë të Apelimit të Federatës Franceze të Futbollit më 20 dhjetor, duke kërkuar që ky i fundit të sanksionojë PSG-në. Asnjë seancë nuk është caktuar për momentin. Ndërkohë, megjithatë, PSG-ja mund të duhet të përgjigjet në nivel evropian për këtë polemikë.
Rregullorja e UEFA-s për “licensimin e klubeve dhe qëndrueshmërinë financiare” kërkon që klubet pjesëmarrëse në kompeticionet evropiane të mos kenë borxhe ndaj punonjësve të tyre.
Neni 82 përcakton se “më 15 korrik, 15 tetor dhe 15 janar të sezonit të licencimit, mbajtësi i licencës nuk duhet të ketë detyrime të prapambetura (…) ndaj personelit (…) që rrjedhin nga detyrimet kontraktuale ose ligjore, të cilat duhet të paguhen deri më 30 qershor, 30 shtator dhe 31 dhjetor respektivisht”.
Për më tepër, rregullorja kërkon që mbajtësi i licencës “të përgatisë dhe të dërgojë, brenda afatit dhe në formatin e komunikuar nga UEFA, një deklaratë që konfirmon mungesën ose praninë e borxheve ndaj stafit”.
Nga ana e saj, PSG-ja thotë se është e qetë dhe siguron se “klubi do të komunikojë, si çdo tremujor, informacionin e kërkuar në UEFA deri më 15 janar, siç bëjnë të gjitha klubet”.
Klubi ndoshta shpreson që UEFA-s do t’i duhet pak kohë për të vendosur.
Sipas rrethit të Mbappe-s, Federata Evropiane e Futbollit tashmë ka elementët e nevojshëm për të marrë një vendim, pasi vlefshmëria e shumave të borxhit u konfirmua në shkallë të parë dhe në apel nga LFP-ja që në fund të tetorit. Vetëm çështja e sanksioneve të mundshme për klubin mbetet e hapur.
Mbetet për t’u parë se çfarë qëndrimi do të mbajë organi evropian. Nuk është e pazakontë që klubet të sanksionohen për mospagesa, madje edhe për shuma shumë më të ulëta se ato në fjalë.
Megjithatë, rasti është delikat. Komisionet e UEFA-s janë teorikisht të pavarura, por duhet mbajtur mend se Nasser al-Khelaifi, presidenti i PSG-së, ka një rol udhëheqës në futbollin evropian si anëtar i komitetit ekzekutiv të UEFA-s dhe president i ECA-së, shoqata e klubeve evropiane. /Albanianpost.com
