Presidenti i Republikës së Shqipërisë Bajram Begaj, priti sot një delegacion nga parlamenti suedez, të përbërë nga Adnan Dibrani, deputet socialdemokrat, i cili kandidon për eurodeputet, dhe që në vijim do të zëvendësohet nga Arbër Gashi.
Përfaqësuesit e Parlamentit suedez, me origjinë nga Kosova, shoqëroheshin nga Ambasadori Ström.
Presidenti Begaj përgëzoi përfaqësuesit suedezo-shqiptarë për arritjet e tyre politike, si dhe për kontributin në forcimin e marrëdhënieve mes dy vendeve, duke veçëar kontekstin e ri pas anëtarësimit të Suedisë në NATO.
Presidenti evidentoi rolin dhe kontributin e vlerësuar të Suedisë, si në kuadër të integrimit të vendit tonë në BE ashtu edhe për ndihmën dhe asistencë suedeze për zhvillim.
Ndërkohë marrëdhëniet shumë të mirë politike duhet të përkthehen në një bashkëpunim të shtuar ekonomik dhe rritjen e investimeve suedeze në Shqipëri.
“Gjatë bashkëbisedimit vëllazëror me dy politikanët e rinj shqiptarë që kontribuojnë në një vend mik si Suedia, u nënvizua mesazhi mbi rëndësinë e angazhimit të gjeneratës së re të politikanëve, me vizion të qartë mbarëkombëtar dhe vlera euro-atlantike. Presidenti theksoi se arritjet e tyre në politikë bëjnë krenarë dhe janë shembuj frymëzimi për diasporën mbarëshqiptare”.
Edhe ministri për Evropën dhe Punët e Jashtme, Igli Hasani ka pasur një takim me dy politikanët./Albanianpost.com
