Aksidentohet një kamion me një veturë në Gjakovë, lëndohet një person
U.D Ministrja e Shëndetësisë, Dr. Dafina Gexha- Bunjaku dhe Sekretari i përgjithshëm, Dr. Naim Bardiqi morën pjesë në Simpoziumin për Sëmundje të Rralla dhe Imunodeficienca Primare, e organizuar nga Shoqata për Sëmundje të Rralla të Kosovës në bashkëveprim me J-Projektin Evropian për Imunodeficienca Primare.
Kështu është bërë e ditur përmes një njoftimi nga Ministria e Shëndetësisë.
Gjatë fjalimit të saj, dr. Gexha –Bunjaku shprehu përkushtimin e Ministrisë së Shëndetësisë për adresimin e sfidave të ndryshme që sëmundjet e rralla paraqesin sot në Kosovë për qytetarët e prekur nga to, familjarë e tyre dhe institucionet shëndetësore.
Sëmundjet e rralla, theksoi ajo, paraqiten si sfidë e veçantë për sistemet publike shëndetësore për shkak të karakteristikave specifike, numrit të madh, diversitetit, burimeve të kufizuara, qasjes së kufizuar të ekspertëve dhe vështirësive për trajtimin efektiv të tyre.
“Në vendin tonë, sëmundjet e rralla deri vonë kanë qenë koncept i njohur vetëm për pacientët, familjarët e tyre dhe profesionistët shëndetësor që pothuaj duarthatë janë marrë me rastet e identifikuara. Por jo edhe për vendimmarrësit në shëndetësi, të cilët deri në Qeverinë Kurti 1 dhe tani në Qeverinë Kurti 2, trajtimin e këtyre pacientëve e kishin bazuar kryesisht në ndihmën e donatorëve, me ndonjë përjashtim aty -këtu. Për fat të mirë, kjo qasje ka ndryshuar me Qeverinë Kurti, e cila me qëllim të adresimit të sfidave të ndryshme që sëmundjet e rralla paraqesin për qytetarët e prekur nga to, e ka trajtuar këtë çështje përmes sigurimit të mjeteve financiare dhe barnave dhe hartimit të Koncept Dokumentit për Sëmundje të Rralla, i cili tashmë është duke u kostuar nga MSh për mbulimin me terapi të pacientëve në vitet në vijim. Gjatë qeverisjes sonë, MSh për herë të parë ka prokuruar dhe siguruar barna për sëmundje të rralla siç është Fibroza Cistike, Morbus Gaucher dhe sëmundje të tjera”, tha ajo.
Synim kryesor. theksoi dr. Gexha Bunjaku është institucionalizimi i përkujdesjes shëndetësore për pacientët me sëmundje të rralla, përfshirë: Informimin dhe edukimin e popullatës dhe profesionistëve shëndetësor për këto sëmundje; Zbulimin dhe diagnostikimin e hershëm; Trajnimin specifik të profesionistëve shëndetësor; Sigurimin e vazhdueshëm dhe të mjaftueshëm të medikamenteve të nevojshme; Trajtimin dhe rehabilitimin, si dhe integrimin social, në mënyrë që këta pacientë të kenë përkujdesjen mjekësore dhe sociale sa më të mirë të mundshme.
“Ne kemi bërë hapa të vendosur në këtë drejtim, sepse këtyre ditëve, Qeveria e Kosovës ka miratuar buxhetin me një ngritje të madhe nga 198 milionë euro sa ishte buxheti për shëndetësinë në vitin 2022, në 296 milionë euro për 2023. Vetëm për mbulimin e Listës së Barnave Esenciale janë buxhetuar 60 milionë euro, që është një ngritje pothuaj 100 %, e cila do të reflektojë patjetër edhe në furnizimin më të mirë të pacientëve të gjitha kategorive me barna…Jemi të vendosur që kësaj çështje t’i kushtojmë kujdesin e merituar”, tha dr. Gexha. /KosovaPress/
