Trump:​ Plani aktual i paqes për Ukrainën nuk është përfundimtar

Presidenti i SHBA-së Donald Trump deklaroi sot se plani i tij aktual i paqes për Ukrainën nuk është oferta e tij përfundimtare, pavarësisht se më herët tha se afati i fundit për të rënë dakord për marrëveshjen e tij prej 28 pikave duhet të jetë e enjtja e ardhshme.

Duke folur jashtë Shtëpisë së Bardhë me gazetarët, presidenti amerikan u pyet nëse plani ishte “oferta përfundimtare”.

“Jo, aspak. Do të donim të arrinim paqen, duhet të kishte ndodhur shumë kohë më parë. Lufta e Ukrainës me Rusinë nuk duhet të kishte ndodhur kurrë. Nëse do të isha president, nuk do të kishte ndodhur kurrë. Po përpiqemi ta përfundojmë. Në një mënyrë ose në një tjetër, duhet ta përfundojmë,” tha Trump, raporton KosovaPress.

Komentet e Trump vijnë një ditë para takimit në Gjenevë të Zvicrës ku këshilltarët e sigurisë kombëtare nga Franca, Gjermania dhe Mbretëria e Bashkuar do të takohen me zyrtarë të BE-së, SHBA-së dhe Ukrainës.

Kryeministri britanik Sir Keir Starmer duke folur me gazetarët në samitin e G20 në Afrikën e Jugut, tha se “fokusi tani është shumë i madh në Gjenevë dhe nëse mund të bëjnë përparim.” Ai shton se synon të flasë me Trump në ditët në vijim dhe me presidentin ukrainas Volodymyr Zelensky sonte.

Ai gjithashtu thotë se në rast të ndonjë armëpushimi, Ukraina “duhet të jetë në gjendje të mbrojë veten”, prandaj ai dhe aleatët ngritën shqetësime në lidhje me kufizimet në ushtrinë e Kievit.

Ndërsa, kancelari gjerman Friedrich Merz tha se Evropa duhet të jetë pjesë e çdo procesi për t’i dhënë fund luftës së Rusisë në Ukrainë.

Merz tha se i kujtoi Trump se si Rusia u përball me Memorandumin e Budapestit, një marrëveshje e vitit 1994 në të cilën Kievi hoqi dorë nga arsenali i tij bërthamor në këmbim të garancive të sigurisë që rezultuan të pamjaftueshme për të penguar Rusinë.

“Luftërat nuk mund të përfundojnë nga fuqitë e mëdha mbi kokat e vendeve të prekura. Nëse Ukraina e humbet këtë luftë dhe ndoshta shembet, kjo do të ketë një ndikim në politikën evropiane në tërësi, në të gjithë kontinentin evropian. Dhe kjo është arsyeja pse ne jemi kaq të përkushtuar ndaj kësaj çështjeje”, tha Merz pas samitit G20 në Johanesburg.

Presidenti ukrainas Volodymyr Zelenskyy tha se paqja mund të arrihet vetëm duke garantuar që Rusia nuk mund të nisë një pushtim të tretë.

Duke iu drejtuar çështjes së bisedimeve midis një delegacioni ukrainas dhe aleatëve të saj, ai tha se “përfaqësuesit tanë e dinë se si t’i mbrojnë interesat kombëtare ukrainase dhe saktësisht se çfarë nevojitet për të parandaluar Rusinë të kryejë një pushtim të tretë.”

“Është e nevojshme të sigurohet që askund në Evropë apo në botë të mos mbizotërojë parimi se krimet kundër njerëzve dhe njerëzimit, kundër shteteve dhe popujve, nuk mund të kenë ndonjë shpërblim ose falje,” tha Zelensky, raporton Sky News.

Plani i hartuar nga administrata Trump, propozon që Ukraina të dorëzojë territorin që nuk është i pushtuar dhe gjithashtu që Rusia të mbajë pjesën më të madhe të territorit ukrainas që është nën pushtimin e saj Krimenë, Donetskun dhe Luhanskun, mbajtjen e zgjedhjeve të reja në Ukrainë brenda 100 ditëve, Ukraina të zvogëlojë madhësinë e ushtrisë së saj në 600 mijë personel, si dhe të heqë dorë nga anëtarësimi në NATO. /KosovaPress/