Autoritetet zvicerane po kërkojnë rrugë alternative për të ndikuar te presidenti i SHBA-ve, Donald Trump, pas vendosjes së një tarife të lartë prej 39% mbi eksportet zvicerane, më e larta në Evropë. Disa politikanë të lartë kanë sugjeruar përfshirjen e presidentit të FIFA-s, Gianni Infantino, për shkak të lidhjeve të tij personale me Trumpin, në një kohë kur negociatat zyrtare nuk kanë dhënë rezultate.
Presidentja e Zvicrës, Karin Keller-Sutter, dhe ministri i Ekonomisë, Guy Parmelin, u kthyen pa sukses nga një vizitë në Uashington, ku nuk arritën të sigurojnë një takim me Trumpin. Ata diskutuan me senatorin amerikan Marco Rubio çështje tregtare dhe bashkëpunimin dypalësh, por tarifa mbeti në fuqi. Keller-Sutter, në një postim në platformën X, theksoi se bisedimet me Rubion prekën çështje të rëndësishme ndërkombëtare dhe tregtare.
Pamundësia për të avancuar negociatat ka shtyrë disa figura politike të propozojnë strategji joformale. Infantino, me origjinë nga Brig i Zvicrës, ka një marrëdhënie të ngushtë me Trumpin, e demonstruar nga prania e tij në inaugurimin e presidentit amerikan në janar dhe vizita në Trump Tower për hapjen e një zyre të FIFA-s në SHBA. Guy Parmelin, i cili ka njohje të vjetër me Infantinon dhe ka shërbyer si ministër i Sportit, shihet si një lidhje kyçe për të angazhuar presidentin e FIFA-s.
Deputeti Roland Rino Büchel, nga Partia Popullore Zvicerane (SVP), deklaroi për Financial Times se Infantino mund të luajë një rol vendimtar për të hapur dyert e komunikimit me Trumpin. “Zvicra ka nevojë për ide inovative për të mbrojtur ekonominë dhe vendet e punës,” tha Büchel, duke shtuar se Infantino mund të ndërmjetësojë një takim. Po ashtu, ish-diplomati Thomas Borer e quajti propozimin për përfshirjen e Infantinos si “një ide me vlerë”.
Negociatat e mëparshme me përfaqësuesit e Trumpit, si Jamieson Greer dhe Scott Bessent, nuk arritën të ulin tarifat afër nivelit të dëshiruar prej 10%. Trump, në një bisedë me Keller-Sutter, u fokusua te deficiti tregtar i SHBA-ve me Zvicrën, i cili arrin në 39 miliardë dollarë. Kritikat në mediat zvicerane ndaj menaxhimit të situatës nga presidentja Keller-Sutter janë shtuar, ndërsa Trump, në një intervistë për CNBC, tha se ajo “nuk tregoi gatishmëri për të adresuar shqetësimet” e tij për tregtinë.
As Ministria e Ekonomisë e Zvicrës dhe as FIFA nuk kanë dhënë komente zyrtare për këto zhvillime. /tvsyrivision/
