Martin Zubimendi mund të largohet nga Arsenali gjatë afatit kalimtar të janarit, pasi interesim për mesfushorin spanjoll kanë shfaqur tre gjigantët e futbollit evropian: Real Madridi, Atletico Madridi dhe Chelsea.
Sipas raportimeve, të tri klubet janë duke përcjellë nga afër situatën e 27-vjeçarit, ndërsa Arsenali raportohet se është i gatshëm të shqyrtojë ofertat që mund të vijnë për të.
Zubimendi iu bashkua skuadrës londineze në verën e vitit 2025, nga Real Sociedadi, për shumën prej 60 milionë funtesh, duke u shndërruar fillimisht në një prej lojtarëve të rëndësishëm të trajnerit Mikel Arteta.
Megjithatë, konkurrenca e shtuar në mesfushën e “Topçinjve” ka bërë që ndikimi i tij në skuadër të jetë më i vogël. Bruno Guimaraes dhe Declan Rice së fundmi kanë krijuar partneritetin e preferuar të Artetës në këtë repart.
Arsenali, në rast të largimit të futbollistit, synon të rikuperojë së paku shumën prej 60 milionë funtesh që kishte investuar për transferimin e tij.
Një shitje e mundshme e Zubimendit do t’i ndihmonte gjithashtu klubit londinez të siguronte mjete financiare për transferimin e një anësori me shpejtësi, në mënyrë që të përforcojë alternativat në repartin ofensiv.
Megjithatë, Zubimendi vazhdon të konsiderohet një futbollist i vlefshëm për skuadrën, ndaj largimi i tij në janar do të varet nga oferta që Arsenali do të marrë në tavolinë. /RTKLive
