Aksidentohet një kamion me një veturë në Gjakovë, lëndohet një person
Policia e Kosovës, sot informoi se dje u parandaluan dy raste të kontrabandimit me mallra.
Në rastin e parë, në një bagazh të një veture ishin të ngarkuara rreth 300 kg. kumbulla të thara, të përpunuara për të cilat nuk kishte asnjë dokument përcjellës.
Sipas Policisë ato dyshohet se u sollën nga Serbia.
“Rasti I: Me datën 29.11.2022 rreth orës 15:20 nga njësia e Task Forcës është vërejtur një automjet i dyshuar duke hyrë në territorin e RKS-së nga fshati Breznicë, Republika e Serbisë. I njëjti automjet është përcjellë dhe është ndaluar në Gjilan rreth orës 16:05 me drejtues A. A. mashkull kosovar, i njohur për Policinë si recidivist i veprave penale të kontrabandimit të mallrave. Gjatë kontrollit tek i njëjti në bagazh të veturës dhe ulëseve prapa kishte pasur të ngarkuara rreth 300 kg. fruta (kumbulla të thara) të përpunuara për të cilat nuk kishte asnjë dokument përcjellës për origjinën dhe përmbajtjen e tyre, të cilat dyshohet se janë sjellë nga Republika e Serbisë.”, u bë e ditur në komunikatë.
Ndërsa, në rastin e dytë, gjatë kontrollit të automjetit, u gjetën të ngarkuar rreth 15 thasë duhan të përpunuar, të cilët ishin marrë në Republikën e Maqedonisë së Veriut. Lidhur me këtë rast, në Viti u sekuestruan edhe 10 thasë duhan.
“Rasti 2: Me datën 29.11.2022 rreth orës 21:00 nga njësia e Task Forcës në ardhje nga Maqedonia e Veriut me dyshimin për mall të kontrabanduar është ndaluar në fshatin Stubëll, komuna e Vitisë, automjeti BMW X5 ngjyrë hiri me targa vendore me drejtues K. M. mashkull kosovar si dhe përgjegjësi i mallit J. K. mashkull kosovar. Gjatë kontrollit të automjetit është parë se kishin të ngarkuar rreth 15 thasë duhan të përpunuar të cilin të dyshuarit e kishin marrë në Republikën e Maqedonisë së Veriut. Të dyshuarit mallin kishin në plan për ta dërguar te një person në një fshat të komunës së Vitisë, ku nga njësia e Task Forcës është identifikuar edhe personi i tretë në rast, tek shtëpia e të cilit janë sekuestruar edhe 10 thasë duhan të njëjtë.”, bëri të ditur Policia.
Për të gjitha këto veprime, u njoftua edhe prokurori kujdestar i shtetit, i cili urdhëroi që rastet të iniciohet ‘kontrabandim me mallra’, kurse malli të sekuestrohet dhe të dërgohet në Doganë.
“Rastet janë duke u trajtuar nga njësitë përkatëse policore nga Drejtoria Rajonale Kufitare Lindje në bashkëpunim me Prokurorinë e Shtetit dhe Doganën e Kosovës.”, shtoi tutje Policia.
