OpenAI po përgatit mbrojtje kundër sulmeve kibernetike dhe dezinformimit

OpenAI po ndërmerr një seri masash të reja për të luftuar dezinformimin dhe kërcënimet kibernetike përpara zgjedhjeve në SHBA dhe vende të tjera të botës, ndërsa Inteligjenca Artificiale po bëhet gjithnjë e më e pranishme në fushatat elektorale.

Sipas Axios, kompania do të ofrojë produktet e saj të sigurisë kibernetike, Codex Security dhe programin Trusted Access for Cyber, për prodhuesit e certifikuar të sistemeve të votimit në SHBA.

OpenAI po zhvillon gjithashtu takime informuese me Shoqatën Kombëtare të Sekretarëve të Shtetit dhe Shoqatën Kombëtare të Drejtorëve të Zgjedhjeve në SHBA për kapacitetet më të fundit në fushën kibernetike.

Në kuadër të masave për informacion më të besueshëm zgjedhor, kompania do të shfaqë rezultatet live të votimeve nga Associated Press duke filluar nga kjo vjeshtë në SHBA dhe Brazil. Po ashtu, ajo ka hyrë në partneritet me Democracy Works për të ofruar informacione të sakta mbi procesin e votimit dhe regjistrimit të votuesve.

Kompania po mbështet edhe legjislacion të ri për transparencën ndaj përmbajtjeve të gjeneruara nga AI, përfshirë projektligjet “Protect Elections from Deceptive AI Act” dhe “Preparing Election Administrators for AI Act”, të cilat synojnë frenimin e deepfake-ve dhe manipulimeve digjitale gjatë zgjedhjeve.

Rritja e rolit të Inteligjencës Artificiale në politikë ka sjellë shqetësime të reja globale, pasi kandidatët politikë dhe votuesit po përdorin gjithnjë e më shumë chatbot-e dhe mjete AI për informacion dhe komunikim.

OpenAI kishte ndërmarrë hapa të ngjashëm edhe para zgjedhjeve të vitit 2024, kur kompanitë e AI u përballën me kritika për informacion të pasaktë dhe përmbajtje mashtruese të krijuara nga chatbot-et. /Albanianpost.com