LDK: Kosova nuk mund të gjejë qetësi pa ditur për fatin e të pagjeturve

Nga Lidhja Demokratike e Kosovës kanë përkujtuar të pagjeturit e luftës së fundit në Kosovë, ku 27 prilli shënon Ditën Ndërkombëtare të tyre.

Në njoftim thotë se ditët si kjo janë mision për të mësuar për fatin e tyre, por dhe që të vihet në vend drejtësia në këtë çështje.

Ndër të tjera nga kjo parti shprehen se Kosova nuk mund të gjejë qetësi pa ditur fatin e të zhdukurve të luftës.

“27 prilli shënon Ditën e Personave të Zhdukur me dhunë gjatë luftës në Kosovë. Janë bërë 25 vjet nga përfundimi i luftës së fundit, por që ende nuk dihet për fatin e mbi 1600 personave të zhdukur nga regjimi i Serbisë; të cilët u vranë dhe masakruan të pafajshëm, nga makineria kriminale e ushtrisë dhe policisë serbe”, kanë shkruar nga LDK në Facebook.

“Sot e asaj dite, çdo familjar i të zhdukurve jeton me ankth, pasi që nuk dinë gjë për fatin e më të dashurve të tyre”.

“Ditët si kjo e sotmja përveç që janë ditë përkujtimi; ato janë dhe mision në përpjekjet tona të përditshme për të mësuar për fatin e tyre, por dhe që ta vëmë në vend drejtësinë në këtë çështje”.

“Vendi ynë për të cilin dhanë jetë burra, gra, pleq e fëmijë nuk mund të gjejë qetësi pa ditur për fatin e tyre!”./Botasot/