Lahuta shqiptare në UNESCO, Gonxhja: Një moment historik për identitetin dhe trashëgiminë tonë kulturore

Lahuta, një nga simbolet më të hershme dhe më përfaqësuese të kulturës shqiptare, është përfshirë zyrtarisht në listën e Trashëgimisë Kulturore Jomateriale të UNESCO-s. Ky vlerësim i rëndësishëm ndërkombëtar u shënua me një aktivitet kulturor të mbajtur në HangArt, në Parkun e Artit në Kinostudio, ku u bashkuan lahutarë, mjeshtër artizanë dhe dashamirë të trashëgimisë kulturore.

Lajmin e bëri të ditur ministri Blendi Gonxhja përmes një postimi në rrjetet sociale, duke e cilësuar këtë si një moment historik për pasurinë kulturore të Shqipërisë. Sipas tij, mbrëmja ishte e mbushur me emocione dhe krenari, ndërsa tradita u përcoll përmes performancave artistike, dëshmive autentike dhe dialogut të hapur me ata që e mbajnë gjallë këtë trashëgimi ndër breza.

“Në HangArt, tek Parku i Artit në Kinostudio, mes tingujve të lahutës, mjeshtrave duarartë dhe lahutarëve, në një moment historik për pasurinë tonë kulturore: Lahuta në UNESCO!”, shkruan Gonxhja.

Ai thekson se lahuta përfaqëson shumë më tepër sesa një instrument muzikor. Me vetëm një tel, ajo mbart mijëra rrëfime, duke qenë një simbol i identitetit, historisë dhe kujtesës shpirtërore të shqiptarëve ndër shekuj.

“Krenarë për Shqipërinë! Krenarë për rrënjët tona! Krenarë për një identitet që sot e njeh e gjithë bota!”, shprehet ministri në reagimin e tij.

Futja e lahutës në listën e UNESCO-s konsiderohet një arritje e madhe për kulturën shqiptare, pasi garanton mbrojtjen, ruajtjen dhe promovimin e kësaj trashëgimie të çmuar në nivel ndërkombëtar, duke e bërë atë pjesë të trashëgimisë së përbashkët të njerëzimit./KultPlus.com