KGJK për koeficientin: Ndërhyrje e dëmshme në pavarësinë dhe integritetin e sistemit gjyqësor

Këshilli Gjyqësor i Kosovës ka reaguar për koeficientin në vlerë 105 euro, duke thënë se kjo paraqet një ndërhyrje të dëmshme në pavarësinë, integritetin dhe mirëfunksionimin e sistemit gjyqësor.

“Këshilli Gjyqësor konsideron se Ligji për Pagat në Sektorin Publik dhe Vendimi i Qeverisë së Republikës së Kosovës për vlerën e koeficienteve, paraqet një ndërhyrje të dëmshme në pavarësinë, integritetin dhe mirëfunksionimin e sistemit gjyqësor”, thuhet në komunikatën e KGJK-së, pas mbledhjes së mbajtur sot, së bashku me Asamblenë e Kryetarëve të Gjykatave dhe Gjyqtarëve Mbikëqyrës.

“Një ndërhyrje e tillë në sistemin gjyqësor, është në kundërshtim të plotë me dispozitat kushtetuese, ligjore si dhe standardet evropiane që u garantojnë gjyqtarëve një sistem të pagave të parashikueshëm dhe nuk lejojnë uljen e pagave. Për më tepër, një qasje e tillë ndaj gjyqësorit është në kundërshtim edhe me Aktgjykimin e Gjykatës Kushtetuese, Ligjin për Gjykatat, Qëndrimet e Komisionit të Venecias dhe Rekomandimet e Këshillit Konsultativ të Gjyqtarëve Evropian“, thuhet tutje në komunkatë.

KGJK tha se ata dhe administrata gjyqësore shprehin shqetësim që as Kuvendi dhe as Qeveria nuk kanë respektuar Vendimin e Gjykatës Kushtetuese për sigurimin e pacenueshmërisë së pagave të sistemit gjyqësor.

Për këtë arsye, KGJK i bëri thirrje Avokatit të Popullit që të veproj në kuadër të kompetencave ligjore, për të kundërshtuar këtë Ligj në Gjykatën Kushtetuese.

“Këshilli Gjyqësor i Kosovës është i vendosur që të ndërmerr të gjitha veprimet kushtetuese dhe ligjore për të mbrojtur dhe promovuar pavarësinë institucionale dhe funksionale të sistemit gjyqësor”, përfundon komunikata.

/KlanKosova/

Read Previous

Kryeministri Kurti: Këto janë 6 kushtet tona për pranimin e Asociacionit

Read Next

Vitia: Si mjek e ministër do të doja paga më të larta për stafin shëndetësor