Inflacioni në Francë ra paraprakisht në 2.2 për qind gjatë muajit prill

Sipas një vlerësimi paraprak, norma vjetore e inflacionit në Francë ra në prill nga 2.3 për qind në mars në 2.2 për qind, njoftoi këtë të martë Instituti Kombëtar Francez i Statistikave dhe Kërkimeve Ekonomike (INSEE).

Tregjet prisnin që inflacioni i prillit të ishte edhe më i ulët në 2.1 për qind.

Çmimet e ushqimeve u rritën me 1.2 për qind nga viti në vit në prill, duke u ngadalësuar nga 1.7 për qind e marsit.

“Ky ngadalësim i lehtë i inflacionit është pasojë e rritjes më të ngadaltë të çmimeve të ushqimeve dhe duhanit, si dhe rënies nga viti në vit të çmimeve të produkteve industriale”, theksohet në deklaratën në faqen e internetit të INSEE.

Në të kundërt, çmimet e energjisë në prill u rritën me 3.8 për qind nga viti në vit, duke u përshpejtuar në krahasim me 3.4 për qind të marsit.

Në bazë mujore, çmimet në Francë u rritën me 0.5 për qind.

Inflacioni francez i matur me indeksin e harmonizuar të çmimeve të konsumit (IHÇK) i përdorur nga Eurostat u rrit me 2.4 për qind nga viti në vit në prill, me të njëjtin ritëm si në muajin mars./AlsatM