Aksidentohet një kamion me një veturë në Gjakovë, lëndohet një person
Charles III do të shpallet edhe zyrtarisht mbret i Mbretërisë së Bashkuar, në një ceremoni që do të mbahet në Pallatin Shën James në mëngjesin e së shtunës.
Flamujt, që janë aktualisht në gjysmë-shtizë, pas vdekjes së Mbretëreshës Elizabeta II, do të ngrihen sërish lart, pas takimit të të ashtuquajturit Këshill i Aderimit.
Përgjatë ditës, mbreti pritet të marrë edhe vendime tjera, para se flamujt të kthehen sërish në gjysmë-shtizë të dielën.
Ky njoftim vjen pasi mbreti është zotuar se do të ndjekë rrugën e “nënës së tij të dashur” për t’i shërbyer kombit.
Ai i ka bërë këto deklarata, në një fjalim emocional më 9 shtator.
Përgjatë fjalimit televiziv, ai e ka kujtuar dashurinë dhe humorin e mirë të nënës së tij, e cila ka qenë në fron për 70 vjet.
Charles është bërë mbret në momentin që nëna e tij ndërroi jetë, por sipas traditave, Këshilli i Aderimit mblidhet sa më shpejt që është e mundur për të shpallur pasardhësin.
Në këtë takim, që nis në orën 10:00 me orën lokale, mbreti do të mbajë një fjalim për vdekjen e mbretëreshës dhe më pas do të bëjë betim për të mbrojtur Kishën e Skocisë, sepse në Skoci pushteti ndahet në mes të kishës dhe shtetit.
Në mesin e pjesëmarrësve do të jenë Camilla, gruaja e Charlesit dhe djali i tij William, princi i ri i Uellsit.
Të premten, Charles është takuar me turmat që janë mbledhur jashtë Pallatit Backingham në Londër.
Njerëzit janë dëgjuar duke bërtitur, “Zot ruaje mbretin!”
Përgjatë fjalimit të së premtes, mbreti e ka pranuar se jeta e tij tani ka ndryshuar, duke thënë se nuk do të mund të japë më “aq shumë energji” në bamirësi dhe çështje që ka mbështetur teksa ka qenë në pritje të fronit.
Monarku 73-vjeçar ka thënë se shpreson që, pavarësisht dhimbjes së popullit britanik për vdekjen e mbretëreshës, njerëzit në Mbretërinë e Bashkuar dhe Komonuelth “do ta kujtojnë atë dhe do të marrin fuqi nga drita e shembullit të saj”.
