Ministria e Arsimit dhe Shkencës ka njoftuar se një njoftim që po qarkullon në rrjetet sociale, sipas të cilit më 6 tetor nuk do të zhvillohet procesi mësimor, është i rremë dhe nuk është publikuar nga Ministria.
MASH ka bërë të ditur se nuk është marrë asnjë vendim për ndërprerjen e mësimit në këtë datë dhe se procesi mësimor zhvillohet sipas orarit të rregullt.
Sipas Ministrisë, në materialin e rremë janë përdorur pa autorizim emri dhe logoja e saj, duke krijuar përshtypjen se bëhet fjalë për një njoftim zyrtar.
Ministria u ka bërë thirrje qytetarëve të mos e shpërndajnë materialin dhe të marrin informacionet vetëm nga faqja zyrtare e saj dhe llogaritë zyrtare në rrjetet sociale. /RTKlive
