Ministri i Luksemburgut për Bashkëpunim dhe Veprim Humanitar, Franz Fayot, sot dhe nesër do të qëndrojë për një vizitë pune në Kosovë.
Gjatë vizitës, ministri Fayot së bashku me zëvendëskryeministrin e Kosovës, Besnik Bislimin, do të bashkëkryesojnë Komisionin e Miks Luksemburg-Kosovë. Kjo do të bëjë të mundur vlerësimin e gjendjes së marrëdhënieve të bashkëpunimit për zhvillim mes dy vendeve, si dhe shkëmbimin e parë për të ardhmen e marrëdhënieve në fushën e bashkëpunimit zhvillimor.
Fayot do të takohet edhe me presidenten Vjosa Osmanin, me kryeministrin Albin Kurtin, dhe ministren e Ekonomisë Artane Rizvanolli.
Pos këtyre takimeve, Fayot do të takohet edhe me zyrtarë nga organizata të ndryshme multilaterale si dhe me përfaqësues të vendeve që mbështesin Kosovën në aspektin e bashkëpunimit bilateral.
Programi do të plotësohet me vizita në projektet e mbështetura nga Luksemburgu, duke përfshirë në veçanti vendin e qendrës së aftësive të ardhshme në teknologjitë e informacionit dhe komunikimit (TIK) në Prishtinë.
/KlanKosova/
