Protesta në Tiranë, sërish përplasje mes protestuesve dhe policisë
Ministria e Arsimit dhe Shkencës (MASh) ka hapur konkurset për mbështetje financiare të studentëve dhe kërkuesve shkencorë përmes bursave për studime të doktoratës brenda dhe jashtë vendit, si dhe për hulumtime postdoktorale jashtë vendit.
Mbështetja financiare ofrohet në kuadër të Programit Kombëtar të Shkencës dhe synon zhvillimin e kapaciteteve kërkimore, avancimin akademik dhe përkrahjen e gjeneratave të reja të studiuesve.
Sipas skemave të përcaktuara, bursat për studime të doktoratës në institucionet vendore kapin vlerën prej 3,000 eurosh, ato për studime të doktoratës jashtë vendit arrijnë në 8,500 euro, ndërsa për hulumtime postdoktorale jashtë vendit parashihet mbështetje financiare prej 10,000 eurosh.
Për herë të parë, MASh po ofron mbështetje të dedikuar edhe për studentët që ndjekin studimet e doktoratës në institucionet e arsimit të lartë në vend.
Përmes këtyre skemave, ministria synon të krijojë mundësi më të mira për zhvillimin akademik dhe profesional të studiuesve të rinj, të nxisë përsosmërinë shkencore, të zgjerojë bashkëpunimin ndërkombëtar dhe të rrisë cilësinë e kërkimit shkencor në Kosovë.
Fuqizimi i hulumtimit dhe inovacionit në institucionet e arsimit të lartë do të jetë gjithashtu pjesë e rëndësishme e Strategjisë së re për Arsim 2035+, me synimin për të forcuar lidhjen ndërmjet universiteteve, zhvillimit të vendit dhe prioriteteve shtetërore.
MASh u ka bërë thirrje kandidatëve të interesuar që të shqyrtojnë kriteret dhe kushtet e aplikimit, si dhe të aplikojnë brenda afateve të përcaktuara në konkurset përkatëse./KultPlus.com
