Kush është Ulrich Siegmund, lideri i AfD-së që synon postin e kryeministrit të Saksoni-Anhaltit?
Heqja në shkallë të gjerë e rrënojave në zonat e Gazës nën kontrollin ushtarak izraelit mund të zhdukë provat e krimeve mizore dhe të pengojë nxjerrjen e mbetjeve njerëzore, paralajmëroi të hënën Raportuesja Speciale e OKB-së për Territorin e Pushtuar Palestinez, Francesca Albanese, transmeton Anadolu.
“Heqja, thërrmimi dhe zhvendosja e vazhdueshme e rrënojave në Gaza nuk duhet të shkatërrojë provat e krimeve ndërkombëtare ose të pengojë nxjerrjen dhe identifikimin e mbetjeve njerëzore në enklavën e rrethuar”, tha Albanese në një deklaratë.
Ajo theksoi se rrënojat e Gazës përmbajnë mbetje njerëzore dhe prova fizike me rëndësi për hetimet mbi krimet e dyshuara ndërkombëtare, përfshirë gjenocidin.
Autoritetet palestineze vlerësojnë se më shumë se 10.000 njerëz mbeten të varrosur nën rrënoja.
Albanese tha se nxjerrja dhe identifikimi i mbetjeve njerëzore, dokumentimi sistematik dhe ruajtja e provave të mundshme duhet të bëhen para se rrënojat të zhvendosen ose të thërrmohen, duke bërë thirrje që hetuesit ndërkombëtarë të krimeve të mbikëqyrin mbledhjen e provave.
Ajo paralajmëroi gjithashtu shtetet dhe kompanitë e përfshira në heqjen e rrënojave se shkatërrimi i provave të krimeve ndërkombëtare mund t’i ekspozojë ato ndaj përgjegjësisë penale ndërkombëtare.
“Çdo heqje duhet të bëhet në kuadër të një plani të hartuar nga palestinezët dhe të mbështetur nga aktorë që gëzojnë besimin e palestinezëve”, tha Albanese.
“Shkatërrimi i provave të krimeve mizore është i paligjshëm”, shtoi ajo, duke theksuar se rindërtimi i Gazës nuk duhet të “kushtëzohet me fshirjen e së kaluarës së saj dhe të provave të nevojshme për të siguruar drejtësi për viktimat e saj”. /Anadolu Agency/
