“Nuk është figurë unifikuese”, Hoti del kundër Sejdiut për president
Një nga veprat e rëndësishme të piktorës italiane të manierizmit, Lavinia Fontana, është blerë nga Muzeu Kombëtar i Stokholmit, duke iu shtuar koleksionit të institucionit një vepër që për një kohë të gjatë ka qenë pothuajse e panjohur për publikun.
Bëhet fjalë për altarpikturën „Martesa mistike e Shën Katerinës së Aleksandrisë“, të realizuar në vitin 1607, e cila paraqet Virgjëreshën Mari dhe Krishtin Fëmijë duke iu shfaqur në një vizion Shën Katerinës. Në skenë, Krishti fëmijë i vendos një unazë në gisht Katerinës, e cila kishte zgjedhur t’ia kushtonte jetën e saj Zotit.
Sipas Muzeut Kombëtar të Stokholmit, vepra është realizuar në kulmin e karrierës së Fontanës dhe përbën një shembull të rëndësishëm të krijimtarisë së saj. Piktura kishte qenë pjesë e një koleksioni privat italian që nga fundi i shekullit XIX, ndërsa blerja u bë e mundur falë një donacioni nga Sophia Giesecke Fund.
Institucioni suedez ka ndërmarrë vitet e fundit një përpjekje për të pasuruar koleksionin me vepra të artisteve gra të periudhës së Rilindjes dhe Barokut, duke përfshirë edhe piktura të Sofonisba Anguissolës dhe Artemisia Gentileschit.
Lavinia Fontana (1552–1614) konsiderohet ndër gratë e para të epokës së saj që arritën të ndërtonin një karrierë profesionale të pavarur në art. E lindur në Bolonjë, ajo u formua artistikisht nga babai i saj, piktori Prospero Fontana. Në vitin 1577 u martua me fisnikun dhe piktorin Gian Paolo Zappi, por vazhdoi aktivitetin e saj profesional dhe mori porosi nga studiues universitarë dhe aristokracia vendase.
Fontana u dallua veçanërisht si portretiste, ndërsa krijoi gjithashtu vepra me karakter fetar, skena mitologjike dhe altarpiktura monumentale – një fushë ku shumë pak gra artiste të kohës arrinin të merrnin porosi.
Rreth vitit 1590 ajo mori porosinë e saj të parë papnore. Në vitin 1603 u zhvendos me familjen në Romë, ku kërkoi mundësi të reja profesionale dhe u bë një nga gratë e para të pranuara në prestigjiozen Accademia di San Luca.
Fontana konsiderohet gjithashtu si një nga gratë e para në historinë e artit perëndimor që drejtoi një studio të pavarur tregtare, duke ndërtuar një karrierë të suksesshme në një kohë kur profesioni i piktorit ishte kryesisht i dominuar nga burrat.
„Martesa mistike e Shën Katerinës së Aleksandrisë“ do të ekspozohet për publikun në Muzeun Kombëtar të Stokholmit duke nisur nga e marta./KultPlus.com
