Autoritetet turke arrestuan të mërkurën kryetaren e Bashkisë së Üsküdarit në Stamboll, e cila i përket opozitës, si dhe pesë persona të tjerë, në kuadër të një hetimi për shkelje të dyshuara lidhur me lejet e ndërtimit dhe përdorimit të ndërtesave, raportoi rrjeti televiziv NTV.
Bëhet fjalë për valën më të fundit të arrestimeve në kuadër të një hetimi gjyqësor të paprecedentë që përfshin bashkitë e drejtuara nga partia më e madhe opozitare, e cila është kundër presidentit Rexhep Tajip Erdogan.
Sipas mediave turke, mes të arrestuarve janë kryetarja e Bashkisë së Üsküdarit, Sinem Dedetaş, nënkryetarja e bashkisë, sekretarja e bashkisë, një arkitekt, një agjent i pasurive të paluajtshme dhe një kontraktor.
Operacionet policore u zhvilluan njëkohësisht në 11 adresa të ndryshme në Stamboll, ndërsa autoritetet sekuestruan dokumente, dosje dhe materiale dixhitale.
Sipas raportimeve, bashkia dyshohet se ka koordinuar miratimin e lejeve të ndërtimit përmes një sistemi, në të cilin kontraktorëve u kërkohej të nënshkruanin kontrata për shërbime konsulence, si kusht për të marrë miratimet e nevojshme.
Opozita ka hedhur poshtë valën e akuzave, e cila nisi në vitin 2024, duke pretenduar se hetimet janë të motivuara politikisht.
Nga ana tjetër, qeveria turke këmbëngul se sistemi gjyqësor vepron në mënyrë të pavarur.
