Organi qeverisës i Formula 1, FIA, e ka shpallur Çmimin e Madh të Singaporit këtë fundjavë një garë “të rrezikuar nga nxehtësia”.
Vendimi i FIA-s, i marrë për shkak se temperaturat parashikohet të kalojnë 31 gradë Celsius për shkak të lagështisë së lartë në mjedisin tropikal, do të thotë që pilotët mund të përdorin jelekë ftohës gjatë garës.
Përdorimi i jelekëve nuk është i detyrueshëm, por ekipet duhet ta përshtatin sistemin në makinat e tyre për t’u siguruar që asnjë pilot që nuk i përdor ato të mos fitojë avantazh duke pasur një makinë më të lehtë.
Çmimi i Madh i Singaporit shënon herën e parë që një garë është përcaktuar si e rrezikshme nga nxehtësia sipas një rregulli të ri që u prezantua këtë vit.
Megjithatë, kjo nuk do të jetë hera e parë që shoferët kanë përdorur jelekët, ekipet i kanë testuar ato me ndërprerje gjatë gjithë vitit.
George Russell i Mercedes, drejtor i Shoqatës së Pilotëve të Çmimit të Madh (GPDA), e provoi atë në Bahrein në fillim të këtij viti dhe tha të enjten: “Jo të gjithë e gjejnë pjesën e sipërme të rehatshme, por mendoj se disa e gjejnë më të rehatshme se të tjerët, dhe sigurisht me kalimin e kohës do të jeni në gjendje ta përshtatni atë sipas preferencave tuaja”.
“Por koncepti është i mirë, dhe kur garon në 90% lagështi dhe kabinat po arrijnë 60 gradë Celsius, është pak si sauna brenda makinës, kështu që mendoj se të gjithë e mirëpresim”, theksoi ai.
Piloti i Williams, Carlos Sainz, gjithashtu drejtor i GPDA-së, tha se vendimi i FIA-s për të shpallur një rrezik nga nxehtësia ishte “i drejtë”.
Singapori ka qenë prej kohësh i njohur si Çmimi i Madh më i vështirë për shkak të kombinimit të nxehtësisë, lagështirës, gjatësisë së garës, e cila zhvillohet afër limitit maksimal prej dy orësh, dhe sipërfaqes së pistës në Marina Bay. /Albanianpost.com
