Trajneri i Napolit, Antonio Conte, ka komentuar lëndimin e mbrojtësit të Kosovës, Amir Rrahmani, i cili u dëmtua gjatë ndeshjes së javës së kaluar mes Zvicrës dhe Kosovës në Basel.
Rrahmani pësoi një lëndim të lehtë të muskulit të këmbës, ndërsa Conte e ka cilësuar mungesën e tij si goditje të madhe për skuadrën. Në konferencën për shtyp, tekniku italian e vlerësoi kapitenin e Kosovës si një nga lojtarët më të rëndësishëm të Napolit.
“Ai është një mungesë e madhe, luajti 38 nga 38 ndeshjet e edicionit të kaluar. Ai është lojtar kyç në këtë ekip, por siç e kam thënë edhe më parë, duke luajtur çdo tri ditë, plus ndeshjet ndërkombëtare, rreziku i lëndimit do të jetë shumë më i lartë.”, u shpreh Conte.
Qendërmbrojtësi 31-vjeçar do të mungojë në ndeshjen e fundjavës kundër Fiorentinës dhe më 18 shtator ndaj Manchester Cityt në Ligën e Kampionëve.
Megjithatë, ai pritet të rikthehet në fushë më 22 shtator, në ndeshjen Napoli – Pisa. /Koha.net/
