Hulumtuesi i Institutit të Kosovës për Drejtësi, Vullnet Bugaqku, ka thënë se është lajm i mirë që është mbajtur seanca konstituive për zgjedhjen e kryetarit dhe nënkryetarit, pas aktgjykimit të Gjykatës Kushtetuese me anë të së cilit u shpjeguan në detaje dhe u qartësuan mirë procedurat se si duhet të administrohet tutje kjo seancë.
Bugaqku tha se proceduralisht, seanca në pjesën më të madhe i përmbushi kërkesat e Kushtetueses, por sipas tij, disa deputetë e shpërfillën aktgjykimin e Gjykatës Kushtetuese.
“Pati disa shkelje sa i përket mungesave, diku u tha se katër deputetë nuk kishin marrë fare pjesë në kuvend dhe çështja tjetër është se një deputete e kuvendit që ishte e pranishme nuk votoi fare”.
“Pra në këto dy segmente pati një lloj shkelje dhe nuk u zbatua nga ana e këtyre deputetëve urdhri i Gjykatës Kushtetuese që të njëjtit të marrin pjesë në seancën konstituive dhe të njëjtit të votojnë, qoftë pro, kundër apo të abstenojnë”, tha Bugaqku.
Në vlerësimin e tij, Bugaqku tha se proceduralisht dhe në kuptimin e standardeve që i ka ndërtuar Gjykata Kushtetuese, seanca në përgjithësi ishte e rregullt. /Klankosova.tv/
