“A ia vlen të shkoj në kombëtare për t’u fyer dhe sharë? Jo”. Këto janë fjalët e Alvaro Morata për gazetën spanjolle Marca. Një reflektim që futbollisti e shpreh pas asaj që ndodhi në finalen e Nations League, ku penalltia e humbur prej tij i dha trofeun Portugalisë.
Pas asaj ngjarje, ai mori mjaft kritika, akuza e kërcënime. Kapiteni i kombëtares spanjolle ka deklaruar se ndihet i shëruar nga problemi i shëndetit mendor që pësoi vitin e kaluar para Kampionatit Europian, por pranon se “nuk ia vlen” të vazhdojë t’i përgjigjet thirrjes në kombëtare nëse kjo do të thotë të ngacmohet.
“Është e mundur që nuk do të jem këtu në shtator”, tha Morata, tashmë 32 vjeç. Ai zbuloi çështjet që ndikuan në vendimin e tij për t’u larguar nga Atlético: “Kisha frikë nga gjithçka. Kisha shumë mendime të tmerrshme, vetëshkatërruese. Madje mendoja për të falsifikuar dëmtimet në mënyrë që të mos jem aty”.
Kapiteni i Kombëtares është konsultuar me mjekun psikiatër të rekomanduar nga partnerja e tij për mjekim dy muaj para fillimit të Euro 2024. “Kur e pashë, ai kishte dhimbje të pabesueshme, ishte shumë i stresuar dhe ishte thellësisht i dëshpëruar. Ai nuk donte të shkonte në Kampionatin Evropian dhe donte të linte futbollin”, thotë psikiatri Pilar de Castro Manglano.
Morata vlerëson mbështetjen e trajnerit të kombëtares Luis de la Fuente: “Isha në momentin më të errët në të cilin mund të jetë një person dhe ai më besoi mua. Në planin personal, ai ishte trajneri më i mirë që kam pasur ndonjëherë, sepse ai dinte jo vetëm ta kuptonte problemin tim, por edhe ta ndajë atë dhe ta jetojë sikur të ishte i tij“. /Telesport.al/
