Zëvendëspresidenti i Komisionit Evropian dhe shefi i tregtisë, Maros Sefcovic tha të premten vonë se BE mbetet e përkushtuar për negociata të drejta me Uashingtonin, pas thirrjes së Presidentit të SHBA-së, Donald Trump për një tarifë prej 50% për mallrat nga blloku duke filluar nga muaji i ardhshëm.
“BE-ja është plotësisht e angazhuar, e përkushtuar për të siguruar një marrëveshje që funksionon për të dyja palët”, shkroi Sefcovic në X pasi foli me figura biznesi.
“Tregtia BE-SHBA është e pakrahasueshme dhe duhet të udhëhiqet nga respekti i ndërsjellë, jo nga kërcënimet.”
Ai shtoi se Brukseli “është gati të mbrojë interesat tona”, shkruan AA.
Komentet e tij erdhën në përgjigje të postimit të Trump, i cili akuzoi BE-në për shfrytëzimin e SHBA-së në tregti.
Trump tha se administrata e tij do të vendosë një tarifë prej 50% mbi importet e BE-së duke filluar nga 1 qershori, përveç nëse produktet prodhohen në SHBA.
Ai e përshkroi BE-në si “shumë të vështirë për t’u përballuar”, duke përmendur barrierat, penalitetet e korporatave dhe një deficit tregtar që tejkalon 250 miliardë dollarë në vit. “Diskutimet tona me ta nuk po çojnë askund”, tha ai, duke i cilësuar tarifat si një hap të domosdoshëm.
Komisioni Evropian ende nuk ka njoftuar masa të mundshme hakmarrëse, por pritet të zhvillojë konsultime në ditët në vijim. /AnadoluAgency/
