Tesla tërheq mijëra Cybertruck për shkak të dritave “që po i verbojnë shoferët përballë”

Tesla ka shpallur një tërheqje për 63,619 njësi të modelit Cybertruck të prodhuara midis nëntorit 2023 dhe tetorit 2025, pasi është zbuluar se dritat e parkimit janë shumë të ndritshme.

Sipas autoriteteve amerikane, LED-et e përparme tejkalojnë kufijtë e ndriçimit të lejuar nga rregullorja federale FMVSS 108, duke rrezikuar të shpërqendrojnë drejtuesit e tjerë.

Inxhinierët e Tesla-s zbuluan se problemi shkaktohej nga një gabim në softuer që i urdhëronte dritat të jepnin më shumë ndriçim se ç’duhej.

Fatmirësisht, defekti do të rregullohet përmes një përditësimi “over-the-air”, pa nevojë për vizitë në servis.

Tesla nuk është e vetmja që përballet me këtë problem – vitin e kaluar, Porsche bëri një tërheqje të ngjashme për modelin Macan Electric. /Telegrafi/