Nga Ksamili te Alpet, “Skyscanner” promovon Shqipërinë si destinacionin më ekonomik për pushime
Shorti i fazës së grupeve për Kupën e Botës 2026 do të zhvillohet të premten në Qendrën Kennedy në Uashington, duke nisur nga ora 18:00. Në ceremoninë e madhe pritet të marrë pjesë edhe Presidenti i SHBA-së, Donald Trump.
Fillimisht do të shortohen ekipet e Vazos 1 dhe tre vendet pritëse – Kanadaja, Meksika dhe SHBA-ja – i kanë tashmë pozicionet e tyre në grupet A, B dhe C. Pasi të shpërndahen vendet e mbetura të Vazos 1, procedura vazhdon me Vazot 2, 3 dhe 4 deri sa të plotësohen të gjitha grupet. Zvicra ndodhet në Vazon 2 falë renditjes aktuale në FIFA. Në Vazon 4 janë edhe përfaqësuesit që do të dalin nga playoff-et.
Ky Botëror ka edhe një risi: skuadrat më të larta në renditje – Spanja dhe Argjentina – do të vendosen në rrugë të ndryshme të fazës me eliminim direkt. E njëjta gjë vlen për Francën dhe Anglinë. Nëse të gjitha fitojnë grupet e tyre, nuk mund të takohen mes vete deri në finale.
Rregulli i vetëm i kufizimit është që në një grup nuk mund të ketë më shumë se një ekip nga e njëjta konfederatë, me përjashtim të UEFA-s, e cila mund të ketë deri në dy ekipe për grup. Ndërkohë, Zvicra nuk mund të jetë në ndeshjen hapëse, pasi ajo i takon automatikisht një ekipi nga Vazo 3. Meksika do ta luajë këtë duel më 11 qershor 2026 në stadiumin Azteca.
Orari përfundimtar i ndeshjeve, me stadiumet dhe orët e fillimit, do të publikohet të shtunën në orën 18:00. Për shkak të distancave të mëdha mes qyteteve pritëse, FIFA do ta përcaktojë kalendarin vetëm pasi të përfundojë shorti.
Ceremoninë e shortit do ta drejtojnë tre emra të njohur të skenës amerikane: Heidi Klum, Kevin Hart dhe Danny Ramirez, të cilët do të prezantojnë eventin e madh para miliona shikuesve.
Super-kompjuteri parashikon fituesin e Kupës së Botës
Super-kompjuteri i Opta-s ka analizuar mijëra skenarë për Kupën e Botës 2026 dhe në krye të favoritëve del Spanja e Luis de la Fuentes. Kampionët e Evropës shfaqen me një probabilitet 17 për qind për të fituar trofeun dhe modeli statistikor i vendos ata qartë përpara rivalëve.
Pas tyre vjen Franca me 14.1 për qind, e cila kërkon të shkruajë histori duke synuar finalen e tretë radhazi, një arritje që deri tani i përket vetëm Gjermanisë dhe Brazilit. Në vendin e tretë qëndron Anglia me një shans 11.8 për qind, një ekip i fortë statistikisht por i penguar prej dekadash nga mungesa e trofeve të mëdha.
Argjentina, kampionia aktuale e botës, ka vetëm 8.7 për qind për të përsëritur suksesin e vitit 2022, megjithatë mbetet kombi jo-evropian me shanset më të mira. Ndërkohë Portugalia, me 6.6 për qind, shihet si ekipi më premtues që nuk ka fituar kurrë një Kupë Bote dhe kërkon të shfrytëzojë momentin e mirë pas triumfit në Ligën e Kombeve.
Sa i përket mikpritësve, vetëm Meksika ka një shans të matshëm me 1.3 për qind, ndërsa Shtetet e Bashkuara dhe Kanadaja mbeten shumë larg garës për titull. Nga Afrika, Maroku ruan statusin e ekipit më konkurrues, me 1.1 për qind, duke u mbështetur në ecurinë historike të vitit 2022.
Super-kompjuteri ka dhënë verdiktin e tij dhe nëse statistikat dalin të sakta, Spanja duhet të fillojë të përgatisë hapësirën për një trofe të ri në muzeun e saj. /KosovaPress/
