Eileen Higgins bëhet gruaja e parë demokrate që drejton Bashkinë e Miamit pas 30 vjetësh

Eileen Higgins ka fituar zgjedhjet për kryetare bashkie në Miami, duke shënuar fitoren e parë të një demokrateje në qytet pas pothuajse tre dekadash. Ish-komisionerja e qarkut siguroi 59% të votave në balotazh, duke mposhtur kandidatin republikan Emilio Gonzalez, i mbështetur nga presidenti Donald Trump, i cili mori rreth 41% të votave, sipas rezultateve zyrtare.

Gjatë fjalës së fitores, Higgins, 61 vjeç, deklaroi se qyteti “zgjodhi një drejtim të ri” dhe se votuesit “zgjodhën kompetencën mbi kaosin”. Ajo u bë gjithashtu gruaja e parë që drejton Bashkinë e Miamit.

Higgins premtoi të nisë menjëherë punën për të adresuar sfidat kryesore të qytetit, duke theksuar se “Miami është një qytet që u përket të gjithëve”. Gjatë fushatës, ajo u përqendrua në çështje si emigracioni dhe strehimi i përballueshëm, duke u distancuar qartësisht nga politikat e ish-presidentit Trump. Në një intervistë për El País, Higgins theksoi se ajo dhe Trump “kanë pikëpamje shumë të ndryshme” për trajtimin e komuniteteve të emigrantëve dhe i quajti politikat e tij “çnjerëzore dhe mizore”.

Megjithëse gara ishte zyrtarisht jopartiake, Higgins mori mbështetjen e disa figurave të njohura demokrate, përfshirë ish-sekretarin e transportit, Pete Buttigieg, ndërsa Gonzalez kishte pas vetes mbështetjen e Trump dhe guvernatorit të Floridës, Ron DeSantis.

Higgins do të zëvendësojë kryebashkiakun në largim Francis Suarez, i cili kohët e fundit kërkoi nominimin republikan për president. Fitorja e saj vjen në një moment kur Partia Demokratike ka shënuar rezultate të rëndësishme në SHBA gjatë muajve të fundit, përfshirë zgjedhjet në New York, Virxhinia dhe New Jersey./KultPlus.com