Nico Williams del kundër agjentit: Unë mora vendimin për ta refuzuar Barcelonën
E ardhmja e Michael Carrickut në stolin e Manchester Unitedit pritet të vendoset në ditët në vijim, ndërsa Eddie Howe raportohet si një nga favoritët për ta marrë drejtimin e skuadrës angleze.
“Djajtë e Kuq” pësuan humbje të thellë 3:0 ndaj Bournemouthit në “Old Trafford”, rezultat që e ka zgjatur në tetë numrin e ndeshjeve pa fitore dhe e ka lënë skuadrën vetëm pak mbi zonën e rënies nga Premier League.
Sipas raportimeve të “Sky Sports”, drejtuesit e Manchester Unitedit kanë nisur të shqyrtojnë alternativa për postin e trajnerit edhe para humbjes së fundit, pas startit më të dobët të klubit në historinë e Premier League.
Procesi pritet të përshpejtohet në ditët e ardhshme. Carrick pritet të zhvillojë bisedime për të ardhmen e tij, ndërsa drejtori i futbollit, Jason Wilcox, dhe shefi ekzekutiv, Omar Berrada, pritet të takohen me bashkëpronarin e klubit, Sir Jim Ratcliffe.
Në këtë situatë, Eddie Howe shihet si kandidati kryesor për ta zëvendësuar Carrickun, përpara ish-përzgjedhësit të Gjermanisë, Julian Nagelsmann.
Howe, i cili u largua nga Newcastle Unitedi gjatë verës, mund të jetë një alternativë më e lehtë për t’u angazhuar, pasi Manchester Unitedi nuk do të duhej të paguante dëmshpërblim për të. Sipas raportimeve, ai është i gatshëm të diskutojë mundësinë e marrjes së drejtimit të klubit nga Manchesteri.
Megjithatë, Howe pritet të presë fillimisht vendimin përfundimtar të drejtuesve të Unitedit për të ardhmen e Carrickut, përpara se të zhvillojë bisedime konkrete për këtë post. /RTKLive
