Ballkani Perëndimor një hap larg roaming-ut falas në BE

Bashkimi Evropian pritet të ndërmarrë këtë javë një hap të ri drejt integrimit të Ballkanit Perëndimor në tregun e përbashkët të telekomunikacionit.

Sipas agjendës së Komitetit të Përfaqësuesve të Përhershëm të shteteve anëtare (COREPER), më 3 qershor është parashikuar miratimi i një vendimi që autorizon hapjen e negociatave për marrëveshje roaming-u ndërmjet Bashkimit Evropian dhe Shqipërisë, Bosnjë-Hercegovinës, Kosovës, Malit të Zi, Maqedonisë së Veriut dhe Serbisë.

Nëse shtetet anëtare japin dritën jeshile, Komisioni Evropian do të marrë mandatin për të negociuar marrëveshje të veçanta me secilin prej partnerëve të Ballkanit Perëndimor.

Objektivi afatgjatë është integrimi gradual i rajonit në zonën evropiane “Roam Like at Home”, e cila u lejon qytetarëve të përdorin telefonatat, mesazhet dhe internetin celular në vendet pjesëmarrëse pa tarifa shtesë roaming-u.

Nisma përbën një nga zotimet konkrete të Bashkimit Evropian ndaj Ballkanit Perëndimor dhe lidhet drejtpërdrejt me Deklaratën e Samitit BE-Ballkani Perëndimor të mbajtur në Tiranë në vitin 2022, ku liderët u angazhuan për uljen graduale të kostove të roaming-ut mes dy palëve.

Procesi mori një shtysë të re në tetor të vitit 2023, kur operatorët kryesorë të telekomunikacionit nga Bashkimi Evropian dhe Ballkani Perëndimor arritën një marrëveshje vullnetare për uljen e tarifave të transferimit të të dhënave.

Brukseli synon që eliminimi i plotë i tarifave shtesë të roaming-ut mes Bashkimit Evropian dhe vendeve të Ballkanit Perëndimor të realizohet deri në vitin 2028.

Çfarë do të thotë kjo për Shqipërinë?

Nëse negociatat përfundojnë me sukses, qytetarët shqiptarë do të mund të përdorin telefonat e tyre celularë në vendet e Bashkimit Evropian pa tarifa shtesë për telefonata, SMS apo internet, në mënyrë të ngjashme me rregullat që zbatohen sot mes vendeve anëtare të unionit.

Përfitimet nuk do të kufizoheshin vetëm te konsumatorët. Komisioni Evropian e sheh heqjen e barrierave të roaming-ut si një instrument për të nxitur lëvizjen e qytetarëve, turizmin, aktivitetin ekonomik dhe integrimin gradual të vendeve kandidate në tregun e brendshëm evropian.

Ky proces është pjesë e një strategjie më të gjerë të Bashkimit Evropian për afrimin ekonomik të vendeve kandidate me standardet dhe politikat e unionit edhe përpara anëtarësimit të plotë.

Një precedent i ngjashëm u krijua në fillim të vitit 2026, kur Ukraina dhe Moldavia iu bashkuan zyrtarisht zonës evropiane të roaming-ut, duke u bërë vendet e para kandidate që përfitojnë nga ky regjim përpara anëtarësimit në Bashkimin Evropian.

Presidentja e Komisionit Evropian, Ursula von der Leyen, ka lënë të kuptohet se Shqipëria dhe Mali i Zi mund të jenë ndër vendet e para të Ballkanit Perëndimor që do të përfitojnë nga heqja e plotë e tarifave të roaming-ut, nëse procesi ecën sipas planit. /Albanianpost.com