Disa nga zhvillimet më të spikatura në një natë historike zgjedhjesh në SHBA

Parashikohet që demokratët ta marrin kontrollin e Dhomës së Përfaqësuesve, duke e vendosur Hakeem Jeffriesin në rrugën drejt bërjes së kryetarit të parë me ngjyrë të Dhomës së Përfaqësuesve, megjithëse fillimisht do të duhet ta fitojë postin në një votim në seancë plenare, pasi të mblidhet Kongresi i ri.

Disa kandidatë të tjerë po shkruajnë tashmë historinë. CNN ka bërë një përmbledhje:

Abdul El-Sayed parashikohet të bëhet senatori i parë mysliman në SHBA. Demokrati do ta mposhtë ish-përfaqësuesin republikan Mike Rogers në garën për Senatin në Michigan, parashikon Decision Desk i CNN.

Gina Hinojosa parashikohet të bëhet guvernatorja e parë hispanike e Texasit, duke ia marrë postin guvernatorit republikan Greg Abbott, i cili ka shërbyer për gati 12 vjet. Dy kandidatët u përplasën gjatë fushatës për çështje kulturore, përfshirë abortin.

Amy Acton parashikohet të bëhet gruaja e parë e zgjedhur guvernatore e Ohaios. Acton është ish-drejtoreshë e Departamentit të Shëndetësisë të Ohaios, e cila ndihmoi në udhëheqjen e reagimit të shtetit ndaj pandemisë, dhe më parë nuk ka mbajtur asnjëherë ndonjë post të zgjedhur. Ohaio nuk ka zgjedhur një guvernator demokrat në dy dekada, por Acton zhvilloi fushatë si e moderuar, duke u ndarë nga demokratët e tjerë për disa çështje.

Annie Andrews parashikohet të bëhet gruaja e parë e zgjedhur në Senatin amerikan nga Karolina e Jugut. Ajo e mposhti senatorin Darline Graham, duke ua marrë republikanëve një ulëse që e kanë mbajtur për gati tri dekada. Andrews, pediatre 45-vjeçare dhe nënë e tre fëmijëve, punoi në Universitetin Mjekësor të Karolinës së Jugut për 15 vjet.

Xavier Becerra parashikohet të bëhet guvernatori i parë latin i zgjedhur i Kalifornisë. Guvernatori i parë dhe i vetëm hispanik deri më sot, Romualdo Pacheco, qëndroi në detyrë për 10 muaj në vitin 1875, pasi guvernatori Newton Booth dha dorëheqjen, sipas Shoqatës Kombëtare të Guvernatorëve. Pacheco ishte gjithashtu anëtari i parë hispanik i Dhomës së Përfaqësuesve me të drejta të plota vote.