Franco ​Foda, gjithnjë e më i rëndësishëm për Kosovën

Fitorja 1:0 ndaj Irlandës në “Fadil Vokrri” nuk ishte vetëm një nisje e suksesshme e Kosovës në Ligën B të Ligës së Kombeve. Ajo ishte edhe një tjetër dëshmi e rëndësisë që Franco Foda po merr në drejtimin e Kombëtares.

Kosova e mposhti Irlandën me golin e kapitenit Vedat Muriqi në minutën e 83-të, në një ndeshje ku Dardanët patën disa mundësi të mira dhe arritën ta mbanin kundërshtarin larg portës në pjesën më të madhe të takimit.

Por përtej golit dhe tri pikëve, ndeshja në Prishtinë tregoi edhe një tjetër element të rëndësishëm: mënyrën se si Kosova po sillet në fushë nën drejtimin e Fodës.

Trajneri gjerman ka kërkuar vazhdimisht organizim, disiplinë taktike dhe besim te grupi. Përballë Irlandës, këto elemente u panë në një ndeshje ku Kosova nuk u ngut, e kërkoi golin deri në fund dhe e gjeti atë përmes lojtarit që Foda e ka vendosur edhe në rolin e kapitenit.

Vendimi për t’ia besuar shiritin Muriqit është vetëm një prej shembujve të mënyrës se si Foda po ndërton hierarkinë e ekipit. Para ndeshjes me Irlandën, ai konfirmoi Muriqin si kapiten dhe Mërgim Vojvodën si kapiten të dytë.

Në të njëjtën kohë, Foda po përpiqet të ndërtojë një skuadër ku përvoja e futbollistëve të konsoliduar kombinohet me energjinë e lojtarëve të rinj. Përballë Irlandës, në formacionin startues ishin edhe futbollistë si Leon Avdullahu, Baton Zabërgja dhe Dion Gallapeni, ndërsa nga banka pati hapësirë edhe për Ermal Krasniqin e Erblin Osmanin.

Kjo është ajo që e bën punën e Fodës të rëndësishme në këtë fazë të Kombëtares: jo vetëm rezultati i një ndeshjeje, por përpjekja për të krijuar vazhdimësi dhe një strukturë të qartë brenda skuadrës.

Fitorja ndaj Irlandës ishte veçanërisht e rëndësishme pasi Kosova po luan për herë të parë në Ligën B të Ligës së Kombeve. Përballë një kundërshtari me përvojë në këtë nivel, Dardanët morën tri pikët dhe nisën garën me sukses.

Foda tashmë ka një bazë mbi të cilën mund të ndërtojë. Kosova ka fituar ndeshjen e parë, Muriqi ka marrë një rol edhe më të madh brenda ekipit, ndërsa para Kombëtares janë sfida të tjera që do të tregojnë nëse kjo fitore do të jetë vetëm një sukses i radhës apo fillimi i një vazhdimësie.

Për Fodën, sfida tashmë është më e madhe: ta ruajë këtë nivel, ta konsolidojë ekipin dhe ta bëjë Kosovën sa më konkurruese në një grup ku çdo pikë ka peshë.

Fitorja ndaj Irlandës ishte e Kosovës. Por mënyra se si kjo skuadër do të ecë përpara do të jetë edhe një test për punën e selektorit Franco Foda.

Pengesa e radhës për Kosovës është Austria. /KosovaPress/