Përzgjedhësi i Kombëtares së Irlandës, Heimir Hallgrímsson, ka vlerësuar lart Kosovën para përballjes mes dy kombëtareve në stadiumin “Fadil Vokrri”, në kuadër të Ligës së Kombeve, duke e cilësuar ndeshjen si një sfidë të vështirë për ekipin e tij.
Në konferencën për shtyp para ndeshjes, Hallgrímsson ka folur për zhvillimin e Kombëtares së Kosovës ndër vite, duke theksuar rritjen e saj në renditjen e FIFA-s dhe zhvillimin e lojtarëve.
“Duke e njohur Kosovën për kaq shumë kohë, ne luajtëm kundër Islandës në ditët e para të ekipit kombëtar. Ishte e vështirë për analistin në atë kohë, kishte lojtarë të rinj që vinin”, ka thënë fillimisht Hallgrímsson.
“Para së gjithash, jam impresionuar duke parë rritjen nga viti 2016, kur ishin të 190-të në renditjen e FIFA-s, sot janë në vendin e 78-të, kështu që kjo është një rritje e jashtëzakonshme. Shumë mirë për federatën këtu për mënyrën se si i kanë zhvilluar lojtarët e tyre”, shtoi ai.
Trajneri irlandez ka thënë se ekipi i tij do të ishte i kënaqur edhe me një barazim në ndeshjen e parë të këtij turneu.
“Padyshim që do të jetë një ndeshje e vështirë për ne, të gjithë e dimë këtë. I kemi analizuar mjaft mirë dhe i kemi shqyrtuar pikat e tyre të forta, të cilat i kanë shumë. Do të ishim të lumtur të fillonit këtu edhe një barazim, ndeshja e parë e një turneu”.
“Sigurisht, gjithçka varet nga mënyra se si luajmë. Mendoj se lojtarët janë gati për këtë. Sigurisht, duhet të përqendrohemi në lojën kundër tyre. Kjo është një detyrë e vështirë për momentin. Por kur bëhet fjalë për ndeshjen, do të jemi plotësisht të gatshëm për atë që do të vijë”.
Hallgrímsson ka folur edhe për lojtarët e Kosovës, duke veçuar sulmuesin Vedat Muriqi, ndërsa ka vlerësuar edhe Fisnik Asllanin.
“Lojtari që duhet t’i kushtojmë vëmendje është Vedat Muriqi, golashënuesi i dytë në La Liga sezonin e kaluar, duke bërë paraqitje të mëdha. Po ashtu, ai shënoi katër gola javën e kaluar për Fenerbahçen. Gjithashtu, Fisnik Asllani është një lojtar i shkëlqyeshëm. Por Kosova ka në përgjithësi ekip të mirë të cilët luajnë në klube të mëdha si Juventusi, Besiktasi, Udinese”, përfundoi përzgjedhësi i Irlandës.
