Maldivet kërkojnë “bisedime kuptimplota” me Britaninë për sovranitetin e Ishujve Chagos

Zyra presidenciale e Maldiveve ka bërë të ditur se presidenti Mohamed Muizzu i ka kërkuar kryeministrit britanik, Andrew Burnham, bisedime lidhur me sovranitetin e Ishujve Chagos, transmeton Anadolu.

Muizzu theksoi rëndësinë e një “dialogu kuptimplotë” mes Britanisë dhe Maldiveve për sovranitetin e arkipelagut, ndërsa shprehu shqetësim për vendimin e Britanisë për të vazhduar me dorëzimin e Ishujve Chagos te Mauritiusi.

Në maj të vitit 2025, Britania dhe Mauritiusi nënshkruan marrëveshje për transferimin e sovranitetit të arkipelagut në Oqeanin Indian te Mauritiusi, duke i dhënë fund më shumë se dy shekujve të sundimit britanik, në këmbim të lejimit të SHBA-së dhe Britanisë që të vazhdojnë të operojnë bazën ushtarake me rëndësi strategjike “Diego Garcia” për 99 vitet e ardhshme.

Maldivet e kundërshtojnë marrëveshjen Britani-Mauritius, e cila ende nuk ka hyrë në fuqi dhe është në pritje të ratifikimit të brendshëm. Muizzu theksoi historinë e përbashkët dhe lidhjet kulturore mes Maldiveve dhe Chagosit, si dhe mbështetjen afatgjatë të vendit të tij për ruajtjen e mjedisit detar dhe ekspeditat kërkimore shkencore në rajon.

“Në këtë drejtim, ai riafirmoi angazhimin e Maldiveve për të ruajtur një partneritet të besueshëm dhe konstruktiv me Mbretërinë e Bashkuar për çështjet që lidhen me Chagosin, duke mbrojtur njëkohësisht interesat legjitime të shtetit të Maldiveve dhe popullit të tij”, thuhet në deklaratë.

Ai shprehu shpresën se angazhimi i ripërtërirë mes dy vendeve do të kontribuojë në stabilitetin dhe sigurinë në Oqeanin Indian, “veçanërisht në një kohë të pasigurisë globale në rritje”.

Arkipelagu Chagos, një grup prej shtatë atolesh që përfshin më shumë se 60 ishuj në pjesën qendrore të Oqeanit Indian, ndodhet rreth 500 kilometra në jug të Maldiveve. /Anadolu Agency/