Balla: Kuvendi të dënojë dhunën e protestuesve kundër policëve
Ministri i Jashtëm i Rusisë, Sergei Lavrov, dhe sekretari amerikan i Shtetit, Marco Rubio, zhvilluan një takim që zgjati mbi 30 minuta në Manila, në kuadër të aktiviteteve të ASEAN-it.
Sipas Ministrisë së Jashtme ruse, gjatë bisedimeve u trajtuan çështje rajonale dhe ndërkombëtare, përfshirë situatën në Gji, ndërsa një pjesë e rëndësishme e diskutimeve iu kushtua konfliktit në Ukrainë.
Moska bëri të ditur se Lavrov e informoi Rubion mbi atë që e cilësoi si “situata reale” përgjatë vijës së frontit dhe theksoi se është “e papranueshme vazhdimi i furnizimit me armë të regjimit të Kievit”.
Sipas deklaratës së Ministrisë së Jashtme ruse, Lavrov ritheksoi gatishmërinë e Rusisë për të arritur një zgjidhje politike dhe diplomatike të konfliktit, si edhe mbështetjen e Moskës për propozimet e paraqitura nga pala amerikane gjatë takimit mes presidentëve Vladimir Putin dhe Donald Trump në Alaska.
Një ditë më parë, Lavrov kishte deklaruar se Rusia niset nga supozimi se Uashingtoni nuk i ka braktisur ende propozimet e diskutuara në atë takim.
Para takimit me Lavrovin, Marco Rubio refuzoi t’u përgjigjej pyetjeve të gazetarëve amerikanë.
Një gazetare e pyeti nëse do të kërkonte sqarime nga homologu rus lidhur me pretendimet se Rusia po ndihmon Iranin në sulmet ndaj objektivave të caktuara, por sekretari amerikan i Shtetit nuk dha asnjë koment. /ATSH-ANSA/
