Meksika shkruan histori në Botëror, fiton të gjitha ndeshjet e grupit
Trajneri i Republikës Çeke, Miroslav Koubek, fajësoi “gabimet budallaqe” dhe lodhjen nga udhëtimet e ngjeshura për eliminimin e ekipit të tij nga Kupa e Botës, pas një humbjeje 3-0 nga bashkë-organizatori Meksika të mërkurën, e cila i la ata në fund të Grupit A.
Koubek tha se futbolli çek kishte nevojë urgjente për të rritur standardet e tij teknike për të garuar ndërkombëtarisht pas rikthimit të tyre në Kupën e Botës pas një mungese 20-vjeçare.
Ai mbrojti largimin e sulmuesit Patrik Schick, duke thënë se Adam Hlozek ishte i preferuar për gjendjen e tij fizike dhe përshtatshmërinë me strategjinë sulmuese të ekipit.
Koubek tha se udhëtimet e shpeshta midis vendeve të ndeshjeve, përfshirë fluturimet për në Mexico City, i lanë lojtarët të rraskapitur, duke vënë në pikëpyetje pse Meksika nuk ishte e detyruar të udhëtonte për në Dallas.
Mesfushori Denis Visinsky u prek shumë nga lartësia e madhe në Mexico City, shtoi Koubek, ndërsa shumë lojtarë mbërritën tashmë të lodhur nga sezonet e tyre në klube.
“Kam një kontratë dhe nuk dorëzohem nga asnjë betejë… Patjetër që do ta përmbush kontratën time”, tha Koubek kur u pyet për të ardhmen e tij.
“Futbolli çek ka mbetur prapa, ne duhet ta përmirësojmë lojën tonë, të zgjedhim lojtarë që mund të konkurrojnë në këtë nivel”, tha ai. /KosovaPress/
